Bojxona qoʻmitasining Kontrabandaga qarshi kurashish boshqarmasi xodimlari Davlat xavfsizlik xizmati va ichki ishlar organlari vakillari bilan hamkorlikda tezkor-qidiruv tadbirini oʻtkazdi.
Tadbir davomida Toshkent shahrining Yakkasaroy tumanidagi mehmonxonalardan birida yirik miqdordagi giyohvandlik vositalarining yashirin oldi-sotdisi fosh etildi.
Tezkor kuzatuvda boʻlgan shaxs uchta oʻramga joylangan, umumiy ogʻirligi 1 kilogramm 233 grammni tashkil etuvchi «gashish» giyohvandlik vositasini sotishga kelishgan. U xaridordan kelishilgan pulning bir qismini qabul qilib, evaziga giyohvandlik vositasini berayotgan vaqtida qoʻlga olindi.
Aniqlanishicha, mazkur shaxs avval ham giyohvandlik vositalarini koʻp miqdorda qonunga xilof ravishda sotganligi uchun sudlangan.
Ushbu holat yuzasidan Bojxona qoʻmitasi tomonidan jinoyat ishi qoʻzgʻatilib, tergov harakatlari davom ettirilmoqda.
Maʼlumot berilishicha, bojxona organlari tomonidan joriy yil boshidan buyon huquqni muhofaza qiluvchi boshqa idoralar bilan hamkorlikda aniqlangan 844 ta holatda 2,2 tonnadan ziyod giyohvandlik vositalari, psixotrop va kuchli taʼsir qiluvchi moddalarning bojxona chegaralari orqali noqonuniy olib oʻtilishi hamda yashirin aylanmasiga chek qoʻyilgan.
