29-sentabr kuni Xiva shahrida «Strategik sheriklik: parlamentlararo muloqotni rivojlantirish, yangi vazifalar va hamkorlik istiqbollari» mavzusida toʻrtinchi Oʻzbekiston–Belarus parlamentlararo forumi oʻz ishini boshladi.
Forumda Oʻzbekiston va Belarus parlamentlari palatalari rahbarlari va aʼzolari, hukumat, vazirlik va idoralar, mahalliy Kengashlar, oliy taʼlim muassasalari, yoshlar parlamentlari hamda biznes vakillari qatnashmoqda.
Ikki kunlik tadbir davomida parlamentlararo aloqalarni rivojlantirish, yangi hamkorlik yoʻnalishlarini belgilash va ikki mamlakat oʻrtasidagi sheriklikni mustahkamlash masalalari muhokama qilinadi.
Forum doirasida Oʻzbekiston va Belarus mahalliy vakillik organlari vakillarining uchrashuvi ham oʻtkaziladi.
Xivada Oʻzbekiston va Belarus tadbirkor ayollarining toʻrtinchi biznes-forumi ham tashkil etilmoqda. Unda sanoat kooperatsiyasi, qoʻshma investitsiyalar, agrosanoat, oziq-ovqat xavfsizligi, biotexnologiyalar, turizm, shuningdek, gumanitar va ijtimoiy sohalardagi hamkorlik masalalari koʻrib chiqiladi.
Tadbir ishtirokchilari «Made in Uzbekistan» va «Made in Belarus» brendlari ostida ishlab chiqarilgan milliy mahsulotlar koʻrgazmasi bilan ham tanishishi mumkin.
Forum yakunida Xiva deklaratsiyasini qabul qilish, shuningdek, tijorat shartnomalari, hamkorlik bitimlari va memorandumlarni imzolash rejalashtirilgan.
