Chet elda oʻzbek oshxonasi yoki restoranini tashkil etayotgan yoki ochgan oʻzbekistonlik tadbirkorlar subsidiya olishlari mumkin boʻldi.
Qayd etilishicha, ushbu xizmat Turizm qoʻmitasi tomonidan my.gov.uz portali orqali bepul koʻrsatiladi.
Bunda Oʻzbekistonda roʻyxatdan oʻtgan tadbirkorlar xorijda milliy restoran tashkil etish bilan bogʻliq xarajatlarining 50 foizigacha boʻlgan qismini subsidiya koʻrinishida qaytarib olishlari mumkin.
Subsidiya olish uchun murojaat qilinganida restoranning xorijda roʻyxatdan oʻtgani va bino huquqini tasdiqlovchi hujjatlar, sanitariya va yongʻin xavfsizligi talablariga muvofiqligi, amalga oshirilgan xarajatlar va Oʻzbekistondan mahsulot yetkazib berish hujjatlari hamda restoranning ichki va tashqi fotosuratlari lozim boʻladi.
my.gov.uz orqali topshirilgan ariza 18 ish kuni ichida koʻrib chiqiladi va ijobiy qaror qabul qilingach, subsidiya 7 ish kuni ichida bank hisobvaragʻiga oʻtkazib beriladi.
Agar arizada kamchiliklar boʻlsa, ularni tuzatib, qayta topshirish imkoniyati mavjud.
