DW xabariga koʻra, Mers 29-sentabr kuni jurnalistlar savollariga javob berar ekan, Ukrainaga koʻmakni kuchaytirish boʻyicha Yevropa hamkorlari bilan jadal maslahatlashuvlar olib borilayotganini aytgan.
Uning soʻzlariga koʻra, muhokamalar 15–16-oktabr kunlari Bryusselda oʻtkaziladigan Yevropa kengashi yigʻilishiga tayyorgarlik doirasida kechmoqda. Asosiy eʼtibor Ukraina byudjetiga yordam va havo hujumidan mudofaa tizimlariga qaratilgan.
Mers havo mudofaasini Ukraina mudofaasining «eng zaif nuqtasi» deb atagan. Avvalroq Ukraina prezidenti Volodimir Zelenskiy harbiy xarajatlar uchun qariyb 27 milliard dollar yetishmayotganini bildirgan edi.
Kansler Kiyevga havo mudofaa vositalarini yetkazib berish masalasida jahon yetakchilari bilan shaxsan muzokara olib borayotganini aytgan. Shuningdek, u Rossiyaning fuqarolik infratuzilmasiga zarbalari davom etishi ehtimoli sharoitida Ukraina energiya taʼminotini qishga tayyorlashga umid bildirgan.
«Bular har kuni sodir etilayotgan harbiy jinoyatlardir», - degan Mers Rossiya hujumlari haqida.
Kansler Toʻqayev bilan Rossiyaning Ukrainaga qarshi urushi batafsil muhokama qilinganini bildirgan. U Qozogʻiston rahbariga Vladimir Putin bilan urushni tugatish haqida gaplashgani uchun minnatdorlik bildirib, Germaniya Kiyevni qoʻllab-quvvatlashni, jumladan, diplomatik saʼy-harakatlarni davom ettirishini taʼkidlagan.
Shu munosabat bilan Mers Germaniya tashqi ishlar vaziri Yohann Vadefulning Nyu-Yorkda Rossiya tashqi ishlar vaziri Sergey Lavrov bilan yaqinda oʻtkazgan uchrashuvini tilga olgan. Kanslerning fikricha, Rossiyaning uchrashuvga munosabati Moskva hozircha «jiddiy muzokaralar»dan manfaatdor emasligini koʻrsatgan.
Toʻqayev esa Putin bilan «juda yaxshi munosabatlar»ga ega ekanini aytib, Ukrainadagi urush yuzasidan fikrlarini tinglagani uchun unga minnatdorlik bildirgan.
Qozogʻiston prezidenti urushning darhol toʻxtashini kutmayotganini, ammo uni «muzlatish»ni mojaroga barham berish va diplomatiyaga oʻtish yoʻlidagi birinchi qadam deb bilishini aytgan. U yozda ham shunday taklifni ilgari surgan edi.
Toʻqayev Qozogʻiston boshidanoq BMT nizomiga, jumladan, barcha davlatlarning hududiy yaxlitligi tamoyiliga sodiqligini bildirib kelayotganini taʼkidlagan. Bu pozitsiya uning Germaniya prezidenti Frank-Valter Shtaynmayer bilan uchrashuvi yakunidagi qoʻshma bayonotda ham qayd etilgan.
