2026-yilgi adabiyot boʻyicha Nobel mukofoti laureati 76 yoshli kanadalik yozuvchi va shoir ayol Enn Karson boʻldi. Adib «mumtoz anʼanalar bilan uygʻunlashgan oʻyin tarzidagi muloqot orqali zamonaviy adabiyotning yangi shakllarini yaratgan dadil va novatorlik asarlari» uchun nufuzli mukofotga munosib koʻrildi.
Laureat nomi Shvetsiya akademiyasida oʻtkazilgan matbuot anjumanida eʼlon qilindi.
Akademiya xabariga koʻra, Karson adabiy ijoddagi yangicha yondashuvi hamda klassik anʼanalarni qayta talqin etgani uchun mazkur nufuzli mukofotga loyiq topilgan.
Enn Karson 1950-yilda Kanadaning Toronto shahrida tugʻilgan. U shoir, yozuvchi, tarjimon va filolog olim sifatida tanilgan.
Karson Toronto universitetida oliy maʼlumot olib, oʻsha yerda magistrlik va doktorlik dissertatsiyalarini himoya qilgan.
1979-yildan buyon u turli oliy taʼlim muassasalarida, jumladan, Makgill, Michigan, Nyu-York hamda Prinston universitetlarida antik va qiyosiy adabiyot, shuningdek, adabiy mahorat fanlaridan dars berib kelmoqda.
Karsonning eng mashhur asarlari qatoriga Eros the Bittersweet («Achchiq-shirin eros»), Autobiography of Red («Qizilning tarjimai holi»), Men in the Off Hours («Ishdan tashqari vaqtdagi erkaklar») va The Beauty of the Husband («Erning husni») kiradi.
Karson bir qator nufuzli mukofotlar bilan taqdirlangan koʻplab adabiy asarlar hamda tarjimalar muallifidir.
2005-yilda adib Kanada adabiyotiga qoʻshgan hissasi uchun Kanada ordeni bilan mukofotlangan.
Nobel jamgʻarmasi 1900-yil 29-iyunda shved ixtirochisi va sanoatchisi Alfred Nobelning vasiyatiga binoan tashkil etilgan. Mukofotlar insoniyat taraqqiyotiga foyda keltirgan yutuqlar uchun topshiriladi.
Nobel mukofotlari Shvetsiya qirollik fanlar akademiyasi, Shvetsiya akademiyasi, Karolinska instituti va Norvegiya Nobel qoʻmitasi tomonidan besh yoʻnalishda – fizika, kimyo, adabiyot, fiziologiya yoki tibbiyot hamda tinchlikni mustahkamlash yoʻlidagi faoliyat uchun beriladi.
Bundan tashqari, 1969-yildan buyon Shvetsiya banki tomonidan 1968-yilda taʼsis etilgan Alfred Nobel xotirasiga bagʻishlangan iqtisodiyot fanlari boʻyicha mukofot ham topshirilmoqda.
