Infografikada Yevropaning 42 mamlakatidagi eng yirik ommaviy savdoga qoʻyilgan kompaniyalar keltirilgan. Ular bosh qarorgohi joylashgan davlat boʻyicha ajratilgan va bozor kapitallashuvi asosida baholangan.
Reyting uchun StockAnalysis hamda milliy fond birjalarining 2026-yil sentabr oxiridagi yoki eng soʻnggi mavjud savdo kunidagi maʼlumotlaridan foydalanilgan. Bozor kapitallashuvi kompaniya aksiyalarining jami bozor qiymatini anglatadi.
ASML nega bunchalik qimmat?
ASML ilgʻor mikrochiplarni ishlab chiqarishda qoʻllanadigan oʻta qisqa toʻlqinli ultrabinafsha nurli litografiya - EUV tizimlarining yagona yetkazib beruvchisi sifatida yarimoʻtkazgichlar sanoatida muhim oʻrin tutadi.
Reytingga koʻra, u 42 mamlakat yetakchilari orasidagi yagona texnologik kompaniyadir. Bozor kapitallashuvi boʻyicha esa dunyoda 20-oʻrinni egallagan.
ASML'ning 670 milliard dollarlik qiymati Buyuk Britaniya yetakchisi HSBC bankining 342,4 milliard dollarlik va Shveysariya yetakchisi Roche kompaniyasining 341,5 milliard dollarlik qiymatidan qariyb ikki barobar yuqori.
Yevropaning avvalgi yetakchisi qiymatining 70 foizidan koʻprogʻini yoʻqotgan
Daniyaning Novo Nordisk kompaniyasi 2024-yilda Yevropaning eng qimmat kompaniyasi boʻlgan. Oʻshanda uning bozor qiymati 650 milliard dollardan oshgan.
Yangi reytingda esa Ozempic va Wegovy preparatlarini ishlab chiqaruvchi kompaniyaning kapitallashuvi 168,6 milliard dollar deb koʻrsatilgan. Bu avvalgi yuqori koʻrsatkichga nisbatan 70 foizdan ortiq pasayishdir.
Maqolada bu oʻzgarish Eli Lilly kompaniyasining raqobatchi Mounjaro va Zepbound preparatlari bozordagi ulushini kengaytirayotgani bilan izohlangan. Shunga qaramay, Novo Nordisk Daniyaning eng qimmat kompaniyasi boʻlib qolmoqda.
Koʻp mamlakatlarda banklar yetakchi
Yevropaning 15 mamlakatida eng katta bozor qiymatiga ega kompaniya - bank. Sugʻurta va investitsiya kompaniyalari ham qoʻshilsa, moliya sektori 18 mamlakatda yetakchilik qiladi.
Yana 10 mamlakatda birinchi oʻrin energetika va kommunal xizmatlar kompaniyalariga tegishli. Demak, moliya hamda energetika-kommunal xizmatlar sohalari 42 milliy yetakchining 28 tasini tashkil etadi.
