21-oktabr kuni koʻrilgan choralar saytlarni ehtimoliy hujumlardan himoya qilish va tizimlarni yangilashga qaratilgan. Jumladan, AQSH Milliy xavfsizlik agentligi hamda Germaniya Axborot xavfsizligi federal idorasi - BSI shunday chora koʻrishni qatʼiy tavsiya qilgan.
Germaniyada federal IT-xizmatlar provayderi ITZBund qator hukumat saytlarini vaqtincha oʻchirgan. Ayrim shaharlar maʼmuriyatlari va politsiya boshqarmalari ham tizimlarni yangilash uchun onlayn xizmatlarini toʻxtatgan. Berlindagi «Sharite» klinikasi sayti ham vaqtincha ishlamagan.
Germaniya Raqamlashtirish vazirligi bu harakatlar ehtiyot chorasi ekanini taʼkidlagan. Vazirlik maʼlumotiga koʻra, mazkur zaifliklar bilan bogʻliq xavfsizlik hodisalari haqida xabar kelib tushmagan.
Boshqa Yevropa davlatlarida ham oʻxshash choralar koʻrilgan. Fransiya Ichki ishlar vazirligi zaifliklar bartaraf etilguniga qadar prefekturalar saytlarini, Belgiya Tashqi ishlar vazirligi esa oʻz onlayn resurslarini vaqtincha oʻchirgan.
Niderlandiyada Rotterdam porti, Overheid hukumat portali, KNVB futbol assotsiatsiyasi, beshta yirik siyosiy partiya va qator shifoxonalar saytlari faoliyati toʻxtatilgan.
Xavfsizlik yuzasidan ogohlantirishlar Yevropadan tashqarida ham tarqalgan. Yaponiya bosh vaziri Sanae Takaiti sayt egalarini PHP’dan foydalanayotganini tekshirish va zarur yangilanishlarni oʻrnatishga chaqirgan. Buni tezkor amalga oshirish imkoni boʻlmasa, resurslarni vaqtincha oʻchirishni tavsiya qilgan.
Zaifliklarni Calif va Wiz kompaniyalari mutaxassislari Google’ning Gemini hamda OpenAI’ning ChatGPT sunʼiy intellekt modellari yordamida aniqlagan.
Wiz maʼlumotiga koʻra, ushbu zaifliklar oʻn yildan ortiq vaqt davomida eʼtibordan chetda qolgan. Ulardan foydalanish inson uchun juda murakkab boʻlgan, biroq sunʼiy intellekt bunday vazifalarni bajarish va keng miqyosda takrorlashni osonlashtirmoqda.
PHP dunyo boʻylab koʻplab sayt va onlayn xizmatlarning server qismida qoʻllanadi. Xabarda keltirilishicha, muammo 2004-yilda chiqarilgan PHP 5ʼdan boshlab turli versiyalarga taʼsir qilishi mumkin.
Qoʻllab-quvvatlanayotgan versiyalar uchun tuzatishlar tayyorlangan. Eski versiyalardan foydalanuvchilarga esa dasturiy taʼminotni yangilash tavsiya etilgan.
