DW xabariga koʻra, Zelenskiy 9-oktabr kuni AQSH va Rossiya oʻrtasida dizel eksporti boʻyicha erishilgan kelishuvni tanqid qilgan.
«Putinga sovgʻalar tinchlikka xizmat qilmaydi... Rossiya dizel uchun yana qabihliklar bilan “minnatdorlik bildiradi”. Rossiyaga neft mahsulotlarini sotishga ruxsat berish - davom ettirish emas, tugatish kerak boʻlgan urushga investitsiyadir», - deb yozgan Ukraina rahbari.
Zelenskiy Ukraina keskinlikni pasaytirish boʻyicha oʻzaro qadamlarga tayyorligini bildirgan. U Rossiya Ukraina energetika obyektlariga zarba berishni toʻxtatsa, Kiyev ham Rossiyaning neftni qayta ishlash obyektlariga hujum qilmasligini aytgan.
«Agar Rossiya energetikamizni vayron qilmasa, Ukraina Rossiyaning neftni qayta ishlash obyektlarini yoqmaydi. Biz Amerikaga aynan shunday kelishuvni taklif qilyapmiz va AQShning bunday murosaga erishish uchun kuchi yetarli, deb hisoblaymiz», - degan Zelenskiy.
Ukraina prezidentining fikricha, keskinlikni pasaytirish boʻyicha aniq kelishuvsiz Rossiyaga qarshi sanksiyalarni yumshatish Moskva foydasiga ishlaydi va urushning yanada uzoq davom etishiga sharoit yaratadi.
Avvalroq, 9-oktabr kuni AQSH prezidenti Donald Tramp Vladimir Putin bilan muzokaralarni «juda muvaffaqiyatli» deb baholagan. Uning aytishicha, suhbatda Rossiya dizelini AQSH va jahon bozoriga yetkazib berish boʻyicha kelishuvga erishilgan.
Shu kuni AQSH Moliya vazirligi Tramp topshirigʻiga binoan Xorijiy aktivlarni nazorat qilish boshqarmasi - OFAC Rossiya dizel yonilgʻisini jahon bozoriga yetkazib berishga ruxsat beruvchi vaqtinchalik umumiy litsenziyani zudlik bilan berishini eʼlon qilgan.
Rossiya bosh vaziri oʻrinbosari Aleksandr Novak esa TASS agentligiga Moskva dizel eksportiga qoʻyilgan cheklovlarni rejalashtirilgan muddatdan oldin bekor qilishni boshlayotganini aytgan.
Novak Rossiyaning dizel eksporti istiqbolda oyiga 3 million tonnaga yetishi mumkinligini ham tasdiqlagan.
