Ellik mamlakatdan 150 nafarga yaqin parlamentariyni birlashtirgan mazkur xalqaro anjuman inson huquqlarini himoya qilish, yoshlarning qarorlar qabul qilish jarayonlaridagi ishtirokini kengaytirish hamda zamonaviy tahdidlarga birgalikda yechim topish masalalarini muhokama qilish uchun muhim muloqot maydoni boʻlgani alohida qayd etildi.
Yigʻilish davomida Samarqand konferensiyasiga bagʻishlangan videolavha namoyish etildi. Unda anjumanning muhim lahzalari va erishilgan natijalar aks ettirilib, Oʻzbekistonning yoshlar parlamentarizmini rivojlantirish borasidagi tajribasi xalqaro parlament hamjamiyati eʼtiboriga havola qilindi.
Senat raisi Tanzila Norboyeva Samarqandda bildirilgan gʻoyalar va qabul qilingan tavsiyalar amaliy natijalarga aylanishi kerak ekanligini taʼkidlab, shu maqsadda konferensiyaning yakuniy hujjati eʼlon qilingani va u kelgusi ishlar uchun yoʻl xaritasi sifatida foydalanish uchun muhim ekanligini maʼlum qildi.
