Fargʻona viloyatida katta tezlikda harakatlangan BMW rusumli avtomashina boshqaruvni yoʻqotib, haydovchi halok boʻldi.
Viloyat YHXB axborot xizmati rahbari Elbek Qobilov Kun.uz’ga maʼlum qilishicha, holat 12-oktabr kuni Furqat tumanida sodir boʻlgan.
Soatiga 100 kilometrdan ortiq tezlikda harakatlangan avtomobil haydovchisi keskin burilishda boshqaruvni yoʻqotib, dastlab ogohlantirish ustuni bilan toʻqnashgan, soʻngra simyogʻoch va daraxtga urilgan.
Hodisa oqibatida BMW rulida boʻlgan 28 yoshli haydovchi halok boʻlgan.
Mashinada boʻlgan yoʻlovchining soʻzlariga koʻra, birinchi toʻsiqqa urilish vaqtida u old oyna orqali tashqariga otilib chiqib ketgan.
«Koʻzimni ochib, oʻrnimdan turib qarasam, hamma joy chang edi. Haydovchining yoniga bordim, hamma joyi butunga oʻxshab koʻrindi, pulsini tekshirib koʻrdim, lekin puls yoʻq edi. Tezlikning oxiri oʻlim. Koʻzingizni ochib-yumasiz, boʻldi», – deydi YTHdan omon qolgan yoʻlovchi.
YHXB xabarida qayd etilishicha, haydovchilik guvohnomasiga ega boʻlmagan ushbu haydovchi avval ham organ xodimlari tomonidan avtomobil boshqarmaslik haqida ogohlantirilgan. Shuningdek, yoʻl harakati qoidalarini buzgani uchun unga nisbatan qonuniy chora koʻrilgan. Shunga qaramay, u yana avtomobil boshqargan.
