Tesla (AQSH) kompaniyasi 15-oktabr kuni Roadster elektr sportkarining yangi avlodini taqdim etadi. Taqdimot dastlab ishlab chiqarilishi 2020-yildayoq boshlanishi koʻzda tutilgan modelning ilk namoyishidan qariyb toʻqqiz yil oʻtgach rejalashtirilgan.
Tesla boʻlajak taqdimot haqida ijtimoiy tarmoqlarda eʼlon qildi.Roadster sportkarining ikkinchi avlodi ilk bor 2017-yil noyabrida namoyish etilgan edi. Oʻshanda Tesla mazkur avtomobil joyidan 97 km/soat tezlikka 1,9 soniyada chiqishi, soatiga 400 kilometrdan ortiq tezlikda harakatlana olishi hamda bir quvvatlanishda 998 km gacha masofani bosib oʻtishini maʼlum qilgandi. Biroq ushbu koʻrsatkichlar dastlab eʼlon qilingan versiyaga tegishli boʻlib, seriyali avtomobil uchun hali tasdiqlanmagan.
Loyihaning eng oʻziga xos jihatlaridan biri SpaceX texnologiyasiga ega maxsus versiya boʻlishi mumkin. Avvalroq Tesla rahbari Ilon Mask avtomobilga favqulodda imkoniyatlar bagʻishlashi kutilayotgan kichik tortish kuchiga ega gaz dvigatellaridan foydalanish ehtimoli haqida aytib oʻtgan edi. Namoyish odatiy avtomobil taqdimoti doirasidan chiqadigan elementlarni oʻz ichiga olishi kutilmoqda. Shu bilan birga, bunday versiyaning aniq xususiyatlari va imkoniyatlari hali rasman tasdiqlanishi kerak.
Taqdimotga tayyorgarlik muddatlarning surilishi bilan ham kechdi. Dastlab tadbir 1-oktabrga rejalashtirilgan edi, biroq Tesla noqulay ob-havo prognozi sababli uni 15-oktabrga qoldirdi. Kompaniya buni namoyishni faqat ochiq havoda oʻtkazish mumkinligi bilan buni izohladi.
Koʻp yillik intizorlikka qaramay, ishlab chiqarish boshlanishi va xaridorlarga yetkazib berish muddatlari yuzasidan hamon savollar ochiq qolmoqda. Shu sababli, boʻlajak taqdimot Tesla 2017-yilda ilk bor ommaga koʻrsatilgan loyihani amalga oshirishda qay darajada olgʻa siljiganini tekshiruvchi muhim sinovga aylanadi. Taqdimotning oʻtkazilishining oʻzi esa seriyali ishlab chiqarish tez orada boshlanishini anglatmaydi.
