Prezident Shavkat Mirziyoyev tomonidan 14-oktabr kuni imzolagan qonun bilan Maʼmuriy javobgarlik toʻgʻrisidagi kodeksga (47.3-moddasi) oʻzgartirishlar kiritildi.
Jumladan, endi nikoh yoshiga yetmagan shaxs bilan haqiqiy nikoh munosabatlariga kirishish bazaviy hisoblash miqdorining (BHM) 10 baravaridan 15 baravarigacha - 4,4 million soʻmdan 6,6 million soʻmgacha jarima solishga sabab boʻladi. Ilgari eng yuqori jazo chorasi BHM 10 baravarini tashkil etar edi.
Shuningdek, voyaga yetmagan fuqarolarni turmushga berganlik yoki uylantirganlik uchun ham jarimalar oshdi. Yangi qonun qabul qilingunga qadar aybdorlar BHM 15 baravarigacha boʻlgan miqdorda jarimaga tortilishi mumkin edi, endi esa BHM 20 baravaridan 25 baravarigacha - 8,8 million soʻmdan 11 million soʻmgacha oraliqda jarima belgilandi.
Nihoyat, FHDYoda tegishli tartibda qayd ettirmay diniy marosim (sharʼiy nikoh) oʻtkazganlik, jumladan, 18 yoshga toʻlmagan fuqarolar oʻrtasida shunday nikoh tuzganlik uchun BHM 30–50 baravari miqdorida - 13,2 million soʻmdan 22 million soʻmgacha moliyaviy jazo koʻzda tutilgan. Ilgari bu jarima bazaviy hisoblash miqdorining 30 baravaridan oshmas edi.
Taʼkidlash joizki, joriy yilning 1-sentabridan boshlab nikoh yoshi toʻgʻrisidagi qonunchilik yoki nikoh tuzish qoidalariga rioya etmaslik holatlari yuzasidan qoʻllangan jarima summasining 15 foizi ushbu huquqbuzarliklar haqida xabar bergan shaxsga toʻlab berilishi tartibi amal qilmoqda.
Bugungi kunda Oʻzbekistonda nikoh yoshi erkaklar uchun ham, ayollar uchun ham 18 yosh etib belgilangan. Faqat ayrim hollardagina davlat organlari bu chegarani bir yilga qisqartirishi mumkin. Homiladorlik yoki farzand tugʻilishi kabi holatlar uzrli sabablar sirasiga kiradi.
