BMT Bosh kotibi lavozimiga koʻrsatilgan yetti nomzodning hech biri Xavfsizlik Kengashining veto huquqiga ega barcha doimiy aʼzolari qoʻllab-quvvatloviga erishmadi, deb xabar berdi Associated Press oʻz manbalariga tayanib.
Agentlikning qayd etishicha, Antoniu Guterrishning oʻrnini egallaydigan boʻlajak bosh kotibni tanlash jarayonida ishtirok etayotgan AQSH, Rossiya, Xitoy, Buyuk Britaniya va Fransiya hozirgi nomzodlarning hech birini qoʻllab-quvvatlamasa, ularning oʻrniga yangi nomzodlar koʻrsatilishi mumkin.
BMTning savdo boʻlinmasi rahbari, kosta-rikalik Rebeka Grinspan, Xalqaro atom energiyasi agentligi rahbari, argentinalik Rafael Grossi hamda Gayananing BMTdagi doimiy vakili Kerolin Rodriges-Birkett yangi bosh kotib lavozimiga asosiy daʼvogarlar hisoblanadi. Agentlik xabariga koʻra, ularning har biriga Xavfsizlik Kengashining ikki nafar doimiy aʼzosi qarshi chiqqan.
Xabarda aytilishicha, oxirgi bir necha hafta davomida AQSH maʼmuriyati vakillari nomzodlarning hech biri «ideal» emasligiga ishora qilgan. Vashington tashkilotni tubdan isloh qilishga, shuningdek, BMTning qator tuzilmalaridan chiqishga yoki chiqishni rejalashtirishga eʼtibor qaratgan.
Ammo shunga qaramasdan, AQSH rasmiylari Vashington nomzodlardan birini qoʻllab-quvvatlashi mumkinligini istisno etmayapti. AP manbalariga koʻra, AQShning pozitsiyasi yaqin kunlarda aniq boʻladi.
AQShning BMTdagi doimiy vakili Mayk Uolts tashkilotga BMTni tinchlik va xavfsizlikni taʼminlashdek dastlabki maqsadiga qaytarishga qodir boʻlgan «kuchli va faol rahbariyat» zarurligini taʼkidladi.
«Bu tashkilot 80 yil davomida hamma uchun hamma narsa boʻlishga urindi. Biz uni, taʼbir joiz boʻlsa, parhezga oʻtqizdik - parhezdan keyin barchamizning ahvolimiz biroz yaxshilandi. Endi esa uni yana tinchlik va xavfsizlik masalalariga yoʻnaltirishimiz kerak», - dedi Uolts.
Anʼanaga koʻra, BMT bosh kotibi lavozimi navbatma-navbat turli mintaqalar vakillariga oʻtadi va hozir navbat Lotin Amerikasiga kelgan, deb yozadi AP.
Agentlikning yozishicha, kelasi hafta dastlabki soʻrovning keyingi bosqichi boʻlib oʻtadi. Shu bilan birga, Uolts va Rossiyaning BMTdagi doimiy vakili Vasiliy Nebenzya yangi nomzodlar paydo boʻlishi mumkinligini ham istisno etmadi.
