«Dunyo» axborot agentligi xabariga koʻra, bu masalalar Oʻzbekiston Investitsiyalar, sanoat va savdo vazirligi hamda Raqamli texnologiyalar vazirligi vakillarining Ericsson rahbarlari bilan onlayn uchrashuvida koʻrib chiqilgan.
Muzokaralarda kompaniyaning Janubiy Yevropa va Yevroosiyo boʻyicha rahbari Andrea Missori hamda Markaziy Osiyo va Ozarboyjon boʻyicha rahbari Aydin Abjanbekov ishtirok etgan.
Ericsson vakillari Oʻzbekistonni strategik jihatdan muhim bozorlardan biri deb bilishini va mamlakatdagi faoliyatini rivojlantirishdan manfaatdor ekanini bildirgan. Hamkorlikning ehtimoliy yoʻnalishlari qatorida 5G tarmoqlari, radioaloqa tizimlari va tayanch telekommunikatsiya infratuzilmasini yangilash qayd etilgan.
Kompaniya mobil tarmoqlar uchun apparat va dasturiy yechimlar, raqobatbardosh tijoriy shartlarni taklif qilishga tayyorligini maʼlum qilgan. Zarurat boʻlsa, xalqaro moliya institutlarini jalb etgan holda moliyalashtirish mexanizmlari ham koʻrib chiqilishi mumkin.
Oʻzbekiston tomoni mamlakat telekommunikatsiya bozori xorijiy kompaniyalar va investorlar uchun ochiq ekanini taʼkidlagan.
Kelishuvga koʻra, 2026-yil oxirigacha Ericsson delegatsiyasining Oʻzbekistonga tashrifi tashkil etilib, tegishli vazirliklar va mahalliy mobil operatorlar bilan muzokaralar oʻtkazilishi rejalashtirilgan.
