DW xabariga koʻra, Xarkiv meri Igor Terexov va viloyat harbiy maʼmuriyati rahbari Oleg Sinegubov shaharning ikki tumaniga raketa zarbalari berilganini maʼlum qilgan.
Sinegubovning bildirishicha, bir zarba Slobodskoy, yana uchtasi Nemishlyanskiy tumaniga toʻgʻri kelgan. Hujumdan keyin oʻtkir stress reaksiyasi kuzatilganlar orasida 13 yoshli qiz ham bor.
Nemishlyanskiy tumanida turar joylar shikastlangan. Terexovning dastlabki maʼlumotiga koʻra, yuzdan ortiq deraza singan. Mer kamida bitta hujumda S8000 «Banderol» raketasi qoʻllanganini ham bildirgan.
Kechki zarbalar Xarkivga shu kun davomida uyushtirilgan ikkinchi hujumlar seriyasi boʻldi. Mahalliy hokimiyat maʼlumotiga koʻra, ertalabki zarbalarda 71 yoshli ayol va 58 yoshli erkak halok boʻlgan, 22 kishi jabrlangan. Oʻn kishi shifoxonaga yotqizilgan, ulardan ikkisining ahvoli ogʻir boʻlgan.
16-oktabr kechqurun Dniproga ham zarba berilgan. Dnipropetrovsk viloyati harbiy maʼmuriyati rahbari Aleksandr Ganjaning maʼlum qilishicha, shahar atrofida yongʻin chiqqan. Bir erkak halok boʻlgan, yana toʻrt kishi yaralangan.
Xarkiv avvalgi kunlarda ham hujumlarga uchragan edi. Mahalliy hokimiyat 13-oktabrga oʻtar kechasi berilgan zarbalarda uch kishi halok boʻlgani va 11 kishi yaralanganini xabar qilgan. Oʻshanda raketalardan biri toʻrt qavatli uyga tegib, uning bir podyezdini butunlay vayron qilgan. 11-oktabrda shahar va viloyatga uyushtirilgan hujumlarda esa yana ikki kishi halok boʻlgan.
