Sudya Ariana Faxardo Orshan 1996-yilda insonparvarlik yordami ortilgan ikkita samolyotning yoʻq qilinishi ishi boʻyicha Kubaning sobiq yetakchisi Raul Kastroni hibsga olish toʻgʻrisidagi orderni imzoladi. Bu haqda Mayamidagi NBC6 telekanali xabar berdi.
«Qutqaruvchi birodarlar» notijorat tashkilotiga tegishli ikkita yengil motorli Cessna 337 samolyoti 1996-yil fevral oyida Florida boʻgʻozi ustida Kuba Harbiy-havo kuchlari tomonidan urib tushirilgan edi. Ular AQShga yetib olishga uringan kubalik qochqinlarni qidirish va qutqarish operatsiyasida ishtirok etgan. Hodisa oqibatida toʻrt kishi - uch nafar AQSH fuqarosi va AQShda doimiy yashash guvohnomasiga ega boʻlgan bir nafar Kuba fuqarosi halok boʻldi.
AQSH talqiniga koʻra, samolyotlar xalqaro suvlar ustida urib tushirilgan. Kuba vakillari esa samolyotlar mamlakat havo hududini buzib kirganini taʼkidlagan.
Shu yilning 20-may kuni AQShda hodisa vaqtida mudofaa vaziri lavozimida ishlagan Raul Kastro va yana besh nafar shaxsga toʻrtta qotillik, ikkita havo kemasini yoʻq qilish hamda AQSH fuqarolarini oʻldirish maqsadida til biriktirish boʻyicha rasmiy ayblov eʼlon qilindi.
AQSH uchun ushbu orderning amaliy ahamiyati Raul Kastroni ekstraditsiya qilishni talab etish va uni Floridadagi federal sudga olib kelish uchun protsessual asos yaratishdan iboratdir. AQSH bosh prokurori vazifasini bajaruvchi Todd Blanshning maʼlum qilishicha, rasmiylar uni mamlakatga keltirish choralarini koʻradi va uning sudga «yo ixtiyoriy ravishda, yo boshqa yoʻl bilan» kelishini kutmoqda.
Oʻz navbatida, Kuba hukumati AQSH ayblovlarini «pastkash va sharmandali siyosiy provokatsiya» deb atab, Qoʻshma Shtatlar bunday ayblovlarni ilgari surish uchun na qonuniy asosga va na yurisdiksiyaga ega ekanini bildirdi.
