BMT Butunjahon oziq-ovqat dasturi (WFP) mablagʻ yetishmasligi sababli Gʻazo sektorida insonparvarlik oziq-ovqat yordamini qisqartirmoqda. Bu haqda Reuters agentligi xabar berdi. Ushbu qadam oqibatida 500 mingga yaqin kishi oylik oziq-ovqat koʻmagisiz qoladi.
Tashkilotning maʼlum qilishicha, Gʻazo sektorida oylik yordam oluvchilar soni 1,6 million kishidan 1,1 milliongacha kamaymoqda. WFP maʼlumotlariga koʻra, 1,4 millionga yaqin odam - Gʻazo sektori aholisining uchdan ikki qismi - oʻtkir oziq-ovqat tanqisligiga duch kelmoqda.
Avstraliya teleradioeshittirish korporatsiyasi (ABC) qayd etishicha, ilgari ikkita oziq-ovqat toʻplamini olgan oila endi bitta oladi, un qopining vazni kamayadi, oziq-ovqat toʻplami soni esa 40 foizga qisqaradi. Bundan tashqari, borish qiyin boʻlgan hududlar, jumladan, «sariq chiziq» yaqinida (Isroil harbiylari nazorati ostidagi hududlar bilan chegarada) yashovchi aholiga issiq tushlik har kuni emas, kunora tarqatiladi.
Tashkilotdagilarning taʼkidlashicha, hozir ushbu hududda, shuningdek, Iordan daryosining Gʻarbiy sohilida gumanitar amaliyotlarni davom ettirish uchun yaqin olti oyga 450 million dollar yetishmayapti. WFP direktori vazifasini bajaruvchi Karl Skauning soʻzlariga koʻra, qisqartirishga oziq-ovqat olib kirish boʻyicha qandaydir cheklovlar emas, balki aynan pul tanqisligi sabab boʻlgan. Uning qayd etishicha, dasturning anʼanaviy donorlari - AQSH va Yevropa davlatlari - moliyalashtirishni keskin qisqartirgan, Gʻazo, Sudan va Yamandagi bir vaqtda kechayotgan inqirozlar fonida esa WFP ehtiyojlari, aksincha, ortgan.
U shunday dedi: «Hozir biz butun dunyoga murojaat qilmoqdamiz: ayni damda yuz oʻgirib ketish mumkin emas. Ayni paytda insonparvarlik yordamini saqlab qolish, erishilgan natijalarni himoya qilish hamda hududning tezroq tiklanishiga koʻmaklashish uchun saʼy-harakatlarni kuchaytirish zarur».
