DW xabariga koʻra, voqea 18-oktabr kechqurun sodir boʻlgan. Aviakompaniya Avstriyaning APA axborot agentligiga tahdid haqida xabar kelib tushganini va Bolgariya poytaxtida samolyot tekshirilayotganini tasdiqlagan.
Flightradar24 maʼlumotlariga koʻra, layner dastlab odatiy yoʻnalish boʻyicha harakatlangan. Biroq Ruminiya janubi osmonida keskin burilib, Sofiyaga yoʻnalgan.
Sky News telekanaliga Bolgariya rasmiylari samolyot qoʻnishidan oldin uni milliy harbiy-havo kuchlari qiruvchisi kuzatib borganini bildirgan. Aeroportda barcha yoʻlovchilar bortdan tushirilgan va samolyot koʻzdan kechirilgan.
Taxminan uch soatdan keyin layner Sofiyadan yana havoga koʻtarilgan. U Venaga 19-oktabrga oʻtar kechasi yetib borgan.
Xabarda tahdid kim tomonidan va qanday usulda yuborilgani, shuningdek, tekshiruvning batafsil natijalari ochiqlanmagan.
