The War Zone nashri yozishicha, taxminan bir oy avval Shanhaydagi Chansindao oroli verfida gʻayrioddiy kema qurilishi yakunlanishga yaqinlashgani haqida xabarlar paydo boʻlgan. Uning konstruksiyasi suvosti uchuvchisiz apparatlarini joylashtirish, suvga tushirish va ularga xizmat koʻrsatish uchun moslashtirilgan boʻlishi mumkin.
Guanchjouda olingan yangi tasvirda umumiy koʻrinishi shanxaylik kemaga juda oʻxshash, ammo kichikroq kema aks etgan. Dastlabki baholarga koʻra, u avvalgisidan taxminan uchdan birga kichik. Korpus shaklida ham ayrim farqlar bor.
Yangi kemada oltita koʻtarish minorasi koʻrinadi. Shanhaydagi yirikroq kemada esa oltita katta va oltita kichik konstruksiya mavjud. Ikkala loyihada ham oldingi ustqurma ortida parvoz palubasi va angar joylashgan, tutun quvurlarining oʻrni ham oʻxshash.
Hozircha bu kemalar, avvalo, tajriba platformalari sifatida baholanmoqda. Ularning aniq vazifalari va imkoniyatlari haqida ochiq maʼlumotlar cheklangan.
Bunday kemalar yirik suvosti dronlarini Xitoy sohillaridan uzoq hududlarga olib borish, suvga tushirish, qaytarib olish va texnik xizmat koʻrsatish imkonini berishi mumkin. Bu uzoq vaqt mustaqil patrullik qila oladigan apparatlardan foydalanishni osonlashtiradi.
Katta masofaga harakatlana oladigan suvosti dronlari dengiz tubini xaritalash, minalarni qidirish, suvosti kemalari va suv ustidagi nishonlarni aniqlash kabi vazifalarni bajarishi mumkin. Istiqbolda bunday apparatlardan qanotli raketalar yoki boshqa dronlarni uchirish uchun foydalanish ehtimoli ham muhokama qilinmoqda. Biroq bu imkoniyatlar aynan suratdagi kemalar yoki ular tashiydigan apparatlarda mavjudligi tasdiqlangan emas.
Materialda bunday flotning kengayishi Xitoyning Tinch okeanidagi uzoq hududlarda operatsiyalar oʻtkazish imkoniyatlarini oshirishi mumkinligi taʼkidlangan. AQSH obyektlariga ehtimoliy tahdid haqidagi mulohazalar esa hozircha ushbu texnologiyalarning kelajakdagi qoʻllanishiga oid baholardir.
