Bir oylik harbiy xizmat narxi va shartlari qanday?

Mahalladagi yoshlar yetakchisiga uchrang. Yoshlar yetakchisi uch ish kuni ichida tavsiyanoma tayyorlab, my.gov.uz portalidagi shaxsiy kabinetingizga yuboradi.

Tavsiyanomani mudofaa ishlari boʻlimiga koʻrsating. Shunda siz 9,52 million soʻm toʻlamaysiz.

Bir oylik harbiy xizmatga borish tartibi qanday?

Bir oylik harbiy xizmatga borish uchun fuqaro bir necha bosqichdan oʻtishi kerak:

1. Harbiy xizmat boʻlimiga borish: Chaqiruv qogʻozi yoki my.gov.uz orqali harbiy xizmat boʻlimiga kelish haqida xabar berilgach, chaqiruv qogʻozida koʻrsatilgan vaqtda Mudofaa ishlari boʻlimga boring. U yerda fuqaroga xizmatning shartlari tushuntiriladi va shartnoma tuzish taklif qilinadi.

2. Tibbiy koʻrikdan oʻtish: Shartnoma rasmiylashtirilgach, harbiy xizmatga yaroqlilikni aniqlash uchun tibbiy koʻrikdan oʻtasiz.

3. Toʻlov qilish: Pulni shartnomada koʻrsatilgan hisobraqamiga Xalq banki orqali toʻlaysiz. Shuningdek, boʻlimdagi QR-kodni telefon kamerasi orqali skanerlab, bank ilovasida toʻlov qilish mumkin.

Toʻlovni biryoʻla yoki bosqichma-bosqich 3–12 oyda boʻlib toʻlash mumkin. Pul xizmatga olinganidan keyin bir yil mobaynida toʻlanishi kerak. Toʻlov chekini Mudofaa ishlari boʻlimiga olib boring.

1. Xizmat vaqtini belgilash: Harbiy xizmat boʻlimi xizmatni boshlash sanasi haqida xabar beradi. Talabalar esa xizmatni oʻqishga xalaqit bermaydigan davrda, masalan, taʼtil vaqtida yoki oʻqishni tugatgach oʻtashi mumkin.

Xizmatga borishdan oldin toʻlov miqdori, uni toʻlash muddati va xizmatni boshlash sanasini aniqlashtirib olish kerak. Buning uchun yashash joyidagi mudofaa ishlari boʻlimiga murojaat qilish mumkin.

Tibbiy koʻrik qayerda oʻtkaziladi?

Tibbiy koʻrik Mudofaa ishlari boʻlimida oʻtkaziladi. Chaqiruv qogʻozida qabul vaqti va oʻzingiz bilan olib kelishingiz kerak boʻlgan hujjatlar roʻyxati koʻrsatiladi. Ambulator karta, poliklinikadan koʻchirmalar, maʼlumotnomalar va tekshiruv natijalari, dispanserlardan maʼlumotlar talab qilinadi. Ularni tuman sogʻliqni saqlash boʻlimidan yoki my.gov.uzʼdan yuklab olish mumkin.

Qanday shifokorlardan oʻtish kerak?

Chaqiriluvchi terapevt, jarroh, stomatolog, oftalmolog, LOR, dermatovenerolog, psixiatr va nevropatolog tomonidan tekshiriladi. Kerak boʻlganda qoʻshimcha tahlillar va tekshiruvlarga yuborilishi mumkin.

Bir oylik xizmatning muddatli xizmatdan farqi nimada?

Muddatli harbiy xizmat va safarbarlik chaqiruvi rezervidagi xizmat davomiyligi, toʻlovi hamda oʻtash tartibi bilan farq qiladi. Ularning asosiy jihatlari quyidagi jadvalda keltirilgan.

Bir oylik xizmatni oʻtagan fuqaro belgilangan badalni toʻlab, harbiy yigʻinni toʻliq tugatgan boʻlsa, muddatli harbiy xizmatga chaqirilishdan ozod qilinadi.

Bir yillik yoki bir oylik harbiy xizmat oʻtaganlikdan qatʼi nazar bir xil harbiy guvohnoma topshiriladi.

Harbiy guvohnomada quyidagilar koʻrsatiladi:

Birinchi betida fuqaroning shaxsiga oid maʼlumotlar boʻladi. Keyin ketma-ketlikda harbiy xizmatni oʻtagani yoki oʻtamagani, harbiy unvoni va harbiy hisob mutaxassisligi koʻrsatiladi.

Shuningdek, rezerv yoki zaxiradagi maqomi, harbiy hisobdagi mutaxassisligi, harbiy hisobga qoʻyilgani haqidagi maʼlumotlar boʻladi.

Harbiy guvohnoma xizmat tugagan kundan boshlab 3 kun oʻtib beriladi.

Xizmat vaqtida ish joyi saqlanadimi?

Ha, qonunga koʻra bir oylik harbiy xizmat davrida ish joyi va lavozimi saqlanadi.

Agar fuqaro yigʻin vaqtida kasal boʻlib qolsa va yigʻin tugaganidan keyin ham tuzalmasa, uning ish joyi saqlanadi. Harbiy xizmat tugaganidan keyingi davrda kasallik varaqasi boʻyicha pul toʻlanadi.

Toʻlangan pul qaytariladimi?

Yoʻq, lekin bu boʻyicha qonunda ayrim istisnolar mavjud. Masalan, fuqaro harbiy xizmatga yaroqsiz deb topilib, 27 yoshgacha unga I, II yoki III guruh nogironligi berilsa, toʻlangan mablagʻ qaytariladi. Fuqaro vafot etsa, toʻlangan badalni yaqin qarindoshi, merosxoʻri, vasiysi yoki homiysiga qaytarish nazarda tutilgan.

Ortiqcha yoki xato oʻtkazilgan toʻlovlar qaytariladi.

Harbiy xizmatni oʻtash uchun toʻlangan pullar nimaga sarflanadi?

Harbiy xizmat uchun toʻlanadigan badal pullari Vazirlar Mahkamasi qaroriga asosan quyidagi maqsadlar uchun foydalaniladi:

1. Safarbarlik chaqiruvi rezervi yigʻinlari xarajatlari;

2. Muddatli harbiy xizmatni tugatganlarga nafaqa toʻlovi;

3. Yigʻinlar boshqaruvini taʼminlash;

4. Mudofaa vazirligi binolarini taʼmirlash va qurilish ishlari;

5. Qurol-yarogʻ va texnika xaridlari.

Har bir idora uchun xarajatlar rejasini uning rahbari tasdiqlaydi. Reja Mudofaa vazirligida belgilangan tartibda roʻyxatdan oʻtkaziladi.

Kimlar xizmatdan ozod etiladi va bormasa nima boʻladi?

Agar fuqaro bir oylik harbiy xizmatga borishni uzrli sabablarsiz rad etsa, dastlab Maʼmuriy javobgarlik toʻgʻrisidagi kodeksning 237-moddasiga koʻra, 5 BHMgacha jarima miqdori qoʻllanadi. Jarima vaqtida toʻlanmasa, majburiy ijro byurosi tomonidan undiriladi.

Kimlar harbiy xizmatdan ozod etiladi?

Harbiy xizmatga yaroqsiz deb topilgan fuqaro my.gov.uz orqali harbiy xizmatdan ozod etilgani haqida maʼlumotnoma olishi mumkin.

Tinchlik davrida quyidagi shaxslar muddatli harbiy xizmatga hamda bir oylik xizmatga chaqirilishdan ozod etiladi:

1. Sogʻligʻiga koʻra harbiy xizmatga yaroqsiz deb topilganlar. Bu holat tibbiy koʻrik natijalari asosida belgilanadi; Kasalliklar va ularning ogʻirlik darajalari boʻyicha talablar harbiy-tibbiy koʻrik toʻgʻrisidagi nizomda belgilangan.

2. Aka-ukasi yoki opa-singlisi harbiy xizmatni oʻtash vaqtida halok boʻlgan yoki vafot etganlar. Ular oʻz roziligi bilan harbiy xizmatga chaqirilishi mumkin.

3. Roʻyxatdan oʻtgan diniy tashkilotlardan birida diniy unvonga ega boʻlganlar.

Shuningdek, jinoiy javobgarlikka tortilgan, sudlanganlik holati hali tugamagan fuqarolar ham harbiy xizmatga chaqirilmaydi.

Nimani eslab qolish kerak?

1. Fuqaro xizmatga chaqiruv komissiyasi qarori asosida olinadi, Mudofaa vazirligi bilan shartnoma tuzadi, belgilangan pul badalini toʻlaydi va xizmat davrida bir marta bir oylik harbiy yigʻinda qatnashadi.

2. Badal toʻliq toʻlangan boʻlsa, harbiy guvohnoma xizmat tugagan kundan boshlab 3 kun oʻtib beriladi.

3. Guvohnoma tegishli belgi bilan beriladi.

4. Xizmatni oʻtagan fuqaro muddatli harbiy xizmatga chaqirilishdan ozod qilinadi.