Adliya vazirligi Markaziy bankning moliyaviy xizmatlar sohasidagi maxsus huquqiy rejimga oid idoraviy hujjatini 2026-yil 19-oktabrda 3956-son bilan davlat roʻyxatidan oʻtkazdi.
Hujjat maxsus huquqiy rejimni joriy etish va bekor qilish, shuningdek, uning doirasida faoliyat yuritish tartibini belgilaydi.
«Tartibga solish qumdoni»da uchta alohida sinov yoʻlagi nazarda tutilgan:
«innovatsiya»;
«akseleratsiya»;
«texnologik hamkorlik».
Maxsus rejimda qatnashish imkoniyati norezident yuridik shaxslarga ham berildi. Ular birgalikda ariza beruvchi sifatida ishtirok etishi mumkin. Faoliyati Markaziy bankdan boshqa davlat organlari tomonidan tartibga solinadigan yuridik shaxslar uchun ham «qumdon»da qatnashish imkoniyati yaratildi.
Yangi moliyaviy xizmatni joriy qilmoqchi boʻlgan yuridik shaxslar uchun ariza topshirishdan oldin maslahat olish mexanizmi kiritildi. Shuningdek, «Tartibga solish qumdoni» ishtirokchilari reyestrini yuritish tartibi belgilandi.
Isteʼmolchilarni xabardor qilish boʻyicha alohida talab ham nazarda tutilgan: mazkur rejimdagi moliyaviy xizmatni targʻib qiluvchi reklama va axborot materiallarida u «Tartibga solish qumdoni» doirasida sinov tariqasida taqdim etilayotgani koʻrsatilishi shart.
