Vazirlar Mahkamasining 2026-yil 17-sentabrdagi 493-son qarori bilan Ijtimoiy himoya milliy agentligi tizimidagi muassasalarda byudjetdan tashqari mablagʻlarni shakllantirish imkoniyatlarini kengaytirish chora-tadbirlari belgilandi. Hujjat 18-sentabrda rasmiy eʼlon qilingan.
Qarorga muvofiq, muassasalar pulli xizmatlar koʻrsatishi, mahsulot ishlab chiqarishi va sotishi, mol-mulkini ijaraga berishi mumkin. Ushbu faoliyatdan tushadigan mablagʻlar muassasalarni rivojlantirish jamgʻarmalariga yoʻnaltiriladi.
Pulli xizmatlar reabilitatsiya, tibbiy diagnostika, davolash, qarab turish, defektolog va psixolog xizmatlari kabi yoʻnalishlarni qamrab olishi mumkin. Bunda davlat tomonidan kafolatlangan xizmatlar pulli xizmatlar qatoriga kiritilmaydi. Muassasa xodimlarini majburiy tarzda pulli xizmat koʻrsatishga jalb qilish taqiqlanadi.
Pulli xizmatlar roʻyxati va narxlari tegishli hududiy boshqarma bilan kelishilgan holda muassasa rahbari tomonidan tasdiqlanadi. Narxlar bozor konyunkturasidan kelib chiqib belgilanadi, ammo xizmat tannarxidan kam boʻlishi mumkin emas.
Shuningdek, muassasalarda tarbiyalanuvchilar, oʻquvchilar va doimiy yashovchi shaxslar hunarmandchilik, badiiy-amaliy sanʼat, gul va koʻchatlar, oziq-ovqat va qandolat mahsulotlari tayyorlashi, kompyuter xizmatlari koʻrsatishi mumkin. «Gʻamxoʻrlik» markazlarida nogironligi boʻlgan shaxslarning ijtimoiy-mehnat reabilitatsiyasini amalga oshirish uchun maxsus tayyorlangan joylar tashkil etilishi mumkin.
Xizmat oluvchilar oʻz xomashyosidan tayyorlagan mahsulotni sotishdan tushgan mablagʻning vositachilik haqidan tashqari qismi ularning bank hisobvaragʻiga oʻtkaziladi. Vositachilik haqi mahsulot narxining toʻrtdan bir qismidan koʻp boʻlishi mumkin emas.
Yana bir muhim oʻzgarishga koʻra, muassasalarning boʻsh turgan bino va inshootlari hamda boshqa davlat mulki obyektlari ijtimoiy-mehnat reabilitatsiyasi, kasbga oʻrgatish va mijozlarga pulli xizmatlar koʻrsatish maqsadida ijaraga berilishi mumkin. Ayrim davlat koʻchmas mulk obyektlarini tadbirkorlarga ijara toʻlovining eng kam miqdoriga 0,25 koeffitsiyent qoʻllangan holda toʻgʻridan-toʻgʻri ijaraga berishga ruxsat etiladi.
Pulli xizmatlar va mahsulotlar sotuvidan tushgan mablagʻlar hisobidan muassasa xodimlarini moddiy ragʻbatlantirish ham mumkin. Jumladan, ayrim xodimlarga lavozim maoshining 300 foizigacha ustama, yuqori natija koʻrsatgan xodimlarga esa har chorakda lavozim maoshining 5 baravarigacha mukofot toʻlash nazarda tutilgan.
