Morgan neftni qayta ishlash zavodida ishlaydi, boʻsh vaqtida esa baliq ovlash bilan shugʻullanadi. Uning droni dengiz yuzasiga koʻtarilib, ozuqa tutayotgan finvalni yaqindan kuzatish imkonini bergan.
Finvallar oziqlanish paytida tomogʻidagi choʻziluvchan teri burmalaridan foydalanadi. Bu ularga mayda qisqichbaqasimonlar - kril bilan birga ulkan hajmdagi suvni ogʻziga olish imkonini beradi. Bir marta ogʻiz ochishda bu hajm taxminan 68 ming litrga yetishi mumkin.
Ushbu kitlarning uzunligi 23,8 metrdan oshishi, vazni esa 70 tonnaga yetishi mumkin. Shu bois hatto dengiz yuzasidagi qisqa harakat ham dron kadrlarida hayvonning ulkanligini namoyon qiladi.
Bangor universitetida yirik dengiz yirtqichlari ekologiyasidan dars beruvchi doktor Marianna Kimyenti finvalning suv yuzasiga chiqib oziqlanishi odatiy holat ekanini tushuntirgan.
«Finval uchun suv yuzasiga koʻtarilib, oʻsha yerda oziqlanish mutlaqo tabiiy - bu uning ozuqa topish strategiyasining bir qismi. Ammo uni qirgʻoqqa yaqin suvlarda koʻrish chindan ham hayratlanarli», - degan tadqiqotchi.
Uning aytishicha, nazariy jihatdan bu vaqtga kelib kitlar boshqa hududlarga koʻchib ketgan boʻlishi kerak edi. Biroq finvallarning migratsiyasi va hayot tarziga oid koʻplab jihatlar hali yetarlicha oʻrganilmagan. Ular salqinroq suvlarni afzal koʻrishi taxmin qilinadi.
