Oʻzbekiston delegatsiyasi Yaponiyada boʻlib oʻtayotgan Osiyo oʻyinlarida dastlabki oltin medalga sazovor boʻldi.
21-sentabr kuni karate boʻyicha bahslarda -67 kg vazn toifasida ishtirok etgan Abdulvahob Rashidov chempionga aylandi.
U nimchorak final doirasidagi dastlabki bahsda hongkonglik Cheng Hui Panga hech qanday imkoniyat qoldirmadi (8:0). Chorakfinalda falastinlik Mahmud Dayfalloh (5:1), yarimfinalda esa iordaniyalik Abdulrahmon Almustafo (8:0) ustidan ishonchli gʻalabaga erishdi.
Finalda esa mezbonlar vakili Yugo Kozakidan ham ustun keldi (7:5) va Oʻzbekiston jamoasi safida ilk oltin medal qoʻlga kiritgan sportchiga aylandi.
Bungacha Oʻzbekiston vakillari bitta kumush va bitta bronza ega boʻlib turgandi.
20-sentabr kuni karate boʻyicha -55 kg vazn toifasi vakili Humoyunmirzo Halimov finalda qozogʻistonlik Joloman Bigabilga yutqazib qoʻygan va kumush bilan kifoyalangandi.
21-sentabr kuni aralash jang sanʼatining modern yoʻnalishida -71 kg vazn toifasida ishtirok etgan Nodirbek Shavkatov yarimfinalda Qozogʻiston vakili Qodirbek Shinbayevga yutqazib, bronza olgandi.
Endi Oʻzbekiston bitta oltin, bitta kumush va bitta bronza bilan kuchli oʻnlikka kirib olgan.
Hozircha umumiy reytingda Xitoy yaqqol yetakchilik qilmoqda – 20 ta oltin, 10 ta kumush va 5 ta bronza. Ikkinchi oʻrinda mezbon Yaponiya joylashgan – 8 ta oltin, 11 ta kumush va 12 bronza, uchinchi oʻrinda Janubiy Koreya bormoqda – 5 ta oltin, 3 ta kumush va 13 ta bronza.
Qozogʻiston esa hozircha 4 ta oltin, 1 ta kumush va 3 ta bronza bilan toʻrtinchi oʻrinni egallab turibdi.
