Merkel Putindan Ukraina bilan chegaradagi qo‘shinlarni kuchaytirmaslikni talab qildi

Germaniya kansleri Angela Merkel Rossiya prezidenti Vladimir Putin bilan telefon orqali qilgan muloqotida Donbassdagi nizo va boshqa mavzularni muhokama qildi. Bu haqda Germaniya vazirlar mahkamasi vakili Ulrike Demmer ma'lum qildi.

«Shu bilan birga, Ukraina sharqida Rossiya qo‘shinlarining kuchaytirilishi suhbat mavzusi bo‘ldi. Kansler vaziyatni yumshatish uchun qo‘shinlarni kuchaytirishdan voz kechishni talab qildi», – dedi Demmer.

«Bundan tashqari, Suriya, Liviya hamda Bosniya va Hersegovina mavzusi muhokama qilindi. Shuningdek, Navalniy mavzusi ko‘tarildi», – dedi u.

O‘tgan haftada Ruslan Xomchak Rossiya bo‘lajak «G‘arb 2021» harbiy mashg‘ulotlariga tayyorgarlik bahonasi ostida Ukraina bilan chegaraga – Bryansk va Voronej oblastlari hamda Qrimga qo‘shinlarini joylashtirayotganini aytgandi.

Rossiya prezidentining matbuot kotibi Dmitriy Peskovning so‘zlariga ko‘ra, «Rossiya mamlakat hududi ichida qo‘shinlarini ko‘chirishga haqli, bu boshqa mamlakatlarga nisbatan tahdid uyg‘otmaydi».