2021 yil oxiriga qadar barcha terminallar UzCard va Humo kartalarini qabul qilishni boshlaydi

Joriy yil 13 aprel kuni «Uzcard» va «Humo» kompaniyalari o‘rtasida hamkorlik to‘g‘risidagi memorandum imzolandi.

Ma'lum qilinishicha, hujjat O‘zbekistonda naqd pulsiz hisob-kitoblarni takomillashtirishga hissa qo‘shadigan qo‘shma loyihalar amalga oshirishni nazarda tutadi.

Imzolangan memorandum doirasidagi ilk loyihaga ko‘ra, kompaniyalar infratuzilmalarining bosqichma-bosqich integratsiyalashuvi bo‘ladi. Bunda to‘lov tizimlari terminallari ikkala turdagi kartalarni ham qabul qila boshlaydi.

«Infratuzilmalar integratsiyasi karta egalari, banklar va biznes egalariga sezilarli foyda keltiradi. Xaridorlarning savdo nuqtalariga kelgach qaysi terminallardan foydalanish mumkinligi haqidagi o‘ylari yo‘qoladi, tadbirkorlar esa ikkala kartadan to‘lovlarni bitta terminal orqali qabul qilishlari mumkin bo‘ladi. Shuni ta'kidlashni istardimki, «Uzcard» va «Humo» O‘zbekistonning to‘lov xizmatlari bozorida raqobat muhitini yaratishda davom etadi», deya ma'lum qilgan MBPM direktori Shuhrat Qurbonov.

Qayd etilishicha, to‘lov tizimlarining yaqin hamkorligi bozor talablariga tezroq javob berishga va innovatsion yechimlarni yanada samarali amalga oshirishga imkon beradi. 2021 yil oxiriga qadar terminallar ikkala turdagi kartalarni qabul qilishni boshlashi kutilmoqda.

«Uzcard» va «Humo» o‘rtasidagi hamkorlik moliyaviy xizmatlarni fuqarolar uchun qulayroq va arzonroq qilish, shuningdek, mamlakat chekka hududlarida ham aholining moliyaviy savodxonligini rivojlantirish va yaxshilashga yordam beradi.

Bu, o‘z navbatida, kompaniyalarni yangi texnologiyalar ishlab chiqishga, to‘lov biznesini rivojlantirishga va xizmat ko‘rsatish sifatini oshirishga undaydi. Bundan tashqari, bu halol raqobatni rivojlantirishga va moliyaviy texnologiyalar bozorida yangi ishtirokchilarning paydo bo‘lishiga yordam beradi», deya izoh bergan «Uzcard» bosh direktori Farrux Ziyoyev.

Shuningdek, memorandum doirasida kompaniyalar:

• karta egalari, banklar, to‘lov tashkilotlari va chakana savdo nuqtalari manfaatlarini himoya qilish;
• naqdsiz to‘lovlarni rag‘batlantirish uchun texnologiyalarni takomillashtirish va infratuzilmani kengaytirish;
• to‘lov infratuzilmasi ishonchliligi va axborot xavfsizligini ta'minlash bo‘yicha loyihalarni amalga oshirish yo‘nalishlarida hamkorlik qilishga kelishib olgan.