16:15 / 09.06.2021
2361
O‘zbekiston va Qatar o‘zaro aviaqatnovlarni yo‘lga qo‘yish bo‘yicha kelishuvga erishdi

Bugun O‘zbekiston tashqi ishlar vazirligida Qatar bosh vaziri o‘rinbosari, tashqi ishlar vaziri shayx Muhammad bin Abdulrahmon bin Josim Ol Soniyning mamlakatga rasmiy tashrifi doirasida O‘zbekiston va Qatar hukumatlari o‘rtasida havo qatnovi to‘g‘risidagi bitim imzolandi, deb xabar bermoqda «Dunyo».

Bitim O‘zbekiston  nomidan tashqi ishlar vaziri Abdulaziz Komilov, Qatar nomidan ushbu davlat bosh vaziri o‘rinbosari, tashqi ishlar vaziri shayx Muhammad bin Abdulrahmon bin Josim Ol Soniy tomonidan imzolandi

Bitim havo qatnovini tashkil etish, aviakorxonalarni tayinlash, ularga parvozlarni amalga oshirish huquqini berish, belgilanadigan manzillarni aniqlash, sertifikat va litsenziyalarni tan olish, ikki davlatda tayinlangan aviakorxonalarning vakolatxonalari faoliyatini tartibga solish kabi masalalarni nazarda tutadi.

Hujjat qoidalariga ko‘ra, har bir tomonning belgilangan aviatashkilotlari ikkinchi davlat hududida kelishilgan manzillarda qo‘nishni amalga oshirish va ularning hududlaridan qo‘nmasdan uchib o‘tish uchun tegishli huquqlardan foydalanadi.

Bitimda O‘zbekiston va Qatar o‘rtasidagi havo qatnovlarini rivojlantirish maqsadida aviatashkilotlarga doimiy qatnovlarni amalga oshirishni ta'minlovchi va bojxona yig‘imlari, soliq va boshqa to‘lovlardan ozod etuvchi imtiyozlar o‘zaro asosda taqdim etilishi nazarda tutilgan.

Bundan tashqari, hujjatda aviatsiya sohasidagi xavfsizlik va ikki mamlakat aviatsiya tashkilotlari o‘rtasida yuzaga kelishi mumkin bo‘lgan bahslarni hal etish me'yorlari hamda o‘zaro hamkorlik qilishning boshqa shartlari belgilab qo‘yilgan.

Ma'lumot uchun, joriy yil 6-7 aprel kunlari Toshkentda O‘zbekiston va Qatarning fuqaro aviatsiyasi sohasidagi o‘zaro hamkorligini yanada rivojlantirish maqsadida ikki davlat aviatsiya ma'muriyatlari vakillari o‘rtasida muzokaralar bo‘lib o‘tgan edi.

Mazkur muzokaralarda Qatar fuqaro aviatsiyasi boshqarmasi, O‘zbekiston transport vazirligi, «O‘zaviatsiya» agentligi hamda tomonlarning tayinlangan aviakompaniyalari - «Uzbekistan Airways» AJ va «Qatar Airways» aviakompaniyasi vakillari ishtirok etgandi.

O‘shanda O‘zbekiston va Qatar o‘rtasida to‘g‘ridan to‘g‘ri havo qatnovlarini yo‘lga qo‘yish, havo qatnovi to‘g‘risidagi ikki tomonlama hukumatlararo bitim loyihasi bo‘yicha ishlarni yakuniga yetkazish, «Uzbekistan Airways» va «Qatar Airways» aviakompaniyalari o‘rtasida hamkorlik o‘rnatish va boshqa masalalar muhokama qilingan.

Top