«Bavariya» hujumchisi Robert Levandovski Bundesligadan La Ligaga ko‘chib o‘tdi.
«Bavariya» klubi rasmiy sayti polshalik 33 yoshli forvard transferi bo‘yicha Kataloniya klubi bilan kelishuvga erishganini rasman e’lon qildi. Robert «Barsa» bilan 2025 yilga qadar shartnoma imzolaydi.
«Barselona» Levandovski transferi uchun Myunxen klubiga 45 million yevro va yana 5 mln yevroni bonus sifatida to‘lashi kutilmoqda.
Levandovski Myunxen klubi safiga 2014 yilda qo‘shilib, «Bavariya»da 8 yil davomida to‘p surdi. U jamoada 8 karra Bundesliga g‘olibi, 3 karra Germaniya kubogi sohibi va 5 marta Germaniya Superkubogida zafar quchdi. 2019/20 yilgi mavsumda esa YeChL sohibi bo‘ldi. Shuningdek, Robert so‘nggi 5 yil davomida Bundesliganing eng yaxshi to‘purariga aylandi.
Ma’lumot uchun, 33 yoshli polshalik forvard «Bavariya»dagi 8 yillik faoliyati davomida jami 375 o‘yinda 344ta gol va 72ta assistga mualliflik qilgan.
