Shikoyat taqdiri nima bo‘l(a)di? – Bosh prokuraturaning hokim va investorga oid tekshiruv tafsilotlari haqida

Biroq shu narsani ta’kidlashni istar edikki, Bosh prokuratura xodimlari o‘z ishlarini yaxshi, puxta olib borganliklariga guvoh bo‘ldik. Ularning chet el fuqarosi, xorijiy investor bilan diplomatik munosabatda bo‘lganliklarini ko‘rdik.

Bosh prokuratura ishni o‘rganib chiqib, investitsiyaviy kelishuv doirasida kelib chiqqan nizoni o‘rganish bo‘yicha hukumat rahbari nomiga xat kiritgan. Ayni paytda ishimiz bosh vazirning ko‘rsatmasi bilan tegishli vazirlik va idoralar mas’ul xodimlaridan iborat tarkibda tuzilgan maxsus ishchi guruhi tomonidan o‘rganilmoqda.

— “MJ Developers” kompaniyasi “Minerva city” va boshqa loyihalari, masalan, “Lake city”ni qurishda davom etadimi yoki loyiha to‘xtatiladimi? Hozir jarayon qaysi bosqichda?

— Yuqorida aytganimdek, Bosh prokuratura tomonidan hukumat rahbariga xat kiritilgan. Unga asosan holatni maxsus guruh o‘rganmoqda. Bizning barcha harakatlarimiz amaldagi qonunlar va investitsiya shartnomasi doirasida kechgan. Shu bois “MJ Developers” kompaniyasi foydasiga xulosa qilinishiga umid bildiryapmiz.

Shunday bo‘lgan taqdirda loyiha amalga oshirilib, “Minerva city” ham, “Lake city” ham albatta oxiriga yetkaziladi.

— “Minerva city”ning ko‘p qavatli uylari uchun to‘lov qilgan fuqarolarning pullari bosqichma-bosqich qaytarib berilishi aytilgandi. Hozirda bu jarayon qanday ketyapti? Odamlarga pullar qaytarilyaptimi yoki ularga xonadonlar topshiriladimi?

— Bu ish rejaga ko‘ra davom ettirilyapti. Jumladan, ijtimoiy tarmoqlarda uy olish uchun pul kiritgan va pullarini qaytarib olishni so‘rab chiqqan bir guruh fuqarolarga mablag‘lari to‘liq, hatto vaqtidan oldin qaytarib berildi. Buni ularning o‘zlaridan ham so‘rash mumkin.

Biz 2023 yilda xaridorlarga uylarni topshirishni boshlamoqchi edik. Ya’ni qonun bo‘yicha uylarni topshirish muddatidan kompaniya o‘tib ketgani yo‘q. Shunday bo‘lsa-da, xaridorlarning ayrimlari uy o‘rniga pulni qaytarib olishni afzal bilishdi va ular kiritgan mablag‘lar bosqichma-bosqich qaytarib berilgan va bu ish yana davom ettirilmoqda.

Lekin hozirgi kundagi ijobiy o‘zgarishlar tufayli pulni qaytarib olish emas, balki o‘z uylariga ega bo‘lishni istaganlar ham bor.

— “MJ Developers” kompaniyasining Namangan va Buxorodagi loyihalari muvaffaqiyatli ketayotgani haqida gapirdingiz. Ular qanday loyihalar? Nega Namangan va Buxorodagi loyihalarda hammasi risoladagidek ketmoqda, Toshkentda esa unday emas...

— Qurilish obektlarimizda ish jarayoni to‘xtab qolgani yo‘q. Aksincha, 28 dekabr kuni “Namangan Square” loyihasining rasmiy ochilishi bo‘lib o‘tdi. Aniqrog‘i, ushbu loyiha tarkibiga kiruvchi dastlabki turar joylar qurilishi nihoyasiga yetkazilib, yangi uylarning kalitlari o‘z egalariga Namangan viloyati hokimi va sektor rahbarlari tomonidan rasman topshirildi.

Shuningdek, Buxoro viloyatidagi 5 yulduzli Hyatt Regency mehmonxonasi hududida ham faoliyatimiz jadal ketyapti. Qurilish ishlari deyarli oxiriga yetkazilgan. Hozirda binolarning ichki bezaklari bilan bog‘liq yakuniy jarayon ketyapti. Har ikkala viloyatdagi faoliyatimiz bilan bevosita joyiga borib ham tanishish mumkin.

Toshkentdagi “Minerva city” va “Lake city”ning har ikkalasida ham qurilishga tayyorgarlik va dastlabki qurilish ishlari allaqachon amalga oshirilgan. Biroq ayrim anglashilmovchiliklar va texnik sabablarga ko‘ra, bu hududdagi ishlarimiz to‘xtab qolgan.

Menimcha, bunga asosiy sabablardan biri – hokimiyatda chet el investorlari bilan ishlaydigan mutaxassislarning tajribasi kamligi, qurilish sohasida jahon standartlari bilan bog‘liq yangiliklarni qabul qilishga tayyor emasligi, eng asosiysi, sobiq shahar hokimi Jaxongir Ortiqxo‘jayevning sarmoyadorga nisbatan ishonchsizligida edi deb o‘ylaymiz.

Endilikda bunyod etiladigan binolarning bosh rejalarini qaytadan ko‘rib chiqib, ularni yanada takomillashtirish ustida bosh qotiryapmiz.

***

Tahririyatdan: Kun.uz tekshiruv natijalari bo‘yicha ma’lumot olish maqsadida prokuraturaning tegishli boshqarmasi xodimi bilan bog‘landi. Uning ma’lum qilishicha, sobiq shahar hokimi Jaxongir Ortiqxo‘jayevning advokati bosh prokuror nomiga qo‘shimcha shikoyat arizasi kiritgani sababli tekshirish 1 oy muddatga uzaytirilib, ish holatlari qo‘shimcha o‘rganilmoqda. Bundan tashqari, investitsiya shartlari bo‘yicha nizo masalasini o‘rganib chiqishni so‘rab bosh vazirga xat kiritilgan.

16 yanvar kuni aholini energiya resurslari bilan uzluksiz ta’minlash bo‘yicha ko‘rilayotgan chora-tadbirlar yuzasidan o‘tkazilgan yig‘ilishda prezident o‘z vazifasini uddalay olmagan bir qancha amaldorlar qatori Toshkent shahar hokimi Jahongir Ortiqxo‘jayevni ham ishdan oldi. Uning o‘rniga hokimning birinchi o‘rinbosari Baxtiyor Rahmonov Toshkent shahar hokimi vazifasini bajaruvchi etib tayinlandi.

Ma’lumki, Ortiqxo‘jayev Bosh prokuraturaga shikoyatni shahar hokimi sifatida kiritgan edi. Endilikda bu ariza o‘z kuchida qoladimi? Hokimlikning yangi ma’muriyati o‘rganish davom etishidan va tekshiruv natijalaridan manfaatdormi? Shu kabi savollarga javob olish uchun Kun.uz Toshkent shahar hokimligi matbuot kotibi Mukarram Azimova bilan bog‘landi. Uning ta’kidlashicha, tekshiruv tafsilotlari hokimlikka ma’lum emas.

“So‘rovingizdan so‘ng hamma bo‘limlar bilan gaplashib chiqdim. Bosh prokuraturaga kiritilgan ariza va tekshiruv natijalari bo‘yicha bizda ma’lumot yo‘q, bu axborotlar bizga berilmasligi ma’lum qilingan. Rasmiy izoh Bosh prokuraturaning ijtimoiy tarmoqlardagi sahifalarida e’lon qilinadi. Ta’kidlash kerak, investor bilan suhbat Jahongir Ortiqxo‘jayev bilan bo‘lgan bo‘lsa ham, bu masala shahar hokimligiga taalluqli. Hokimlikning hozirgi ma’muriyati uchun ham bu arizaning taqdiri, tekshirish natijalari muhim. Chunki bular juda katta loyiha va ushbu loyihalar uchun katta hududlar ajratilgan. Katta investitsion loyihalariga katta mablag‘ kiritiladi, bu esa respublika budjeti uchun ham foyda bo‘ladi.

Rasmiy xabarni prokuratura jamoatchilikka e’lon qiladi”, – dedi Mukarram Azimova.

Dilshoda Shomirzayeva,
Kun.uz