Qizlar uchun magistratura tekin – bu imtiyoz barcha magistrant qizlar uchunmi yoki faqat yangi qabul qilinadigan talabalar uchunmi?

Vazirlik matbuot xizmati taqdim etgan ma’lumotga ko‘ra, keyingi yil magistraturada o‘qiyotgan barcha qizlarning kontrakti davlat tomonidan qoplanadi, ya’ni kelasi yil 2-bosqich talabasi bo‘ladigan xotin-qizlarning ham o‘qishi tekin bo‘ladi.

“7 martdagi “Oila va xotin-qizlarni tizimli qo‘llab-quvvatlashga doir ishlarni yanada jadallashtirish chora-tadbirlari to‘g‘risida”gi prezident farmonida davlat oliy ta’lim muassasalarining magistratura bosqichida o‘qiyotgan barcha xotin-qizlarning kontrakt to‘lovlari qaytarish shartisiz qoplab berilishi belgilangan.

Unda 2022/2023 o‘quv yilidan to‘lov kontrakt asosida 1-bosqichga qabul qilinadigan hamda ushbu o‘quv yilida 2-bosqichga o‘tgan magistr xotin-qizlarning kontrakt to‘lovlari qaytarish shartisiz qoplab berilishi nazarda tutilgan”, deyiladi vazirlik Kun.uz’ga taqdim etgan ma’lumotda.

Eslatib o‘tamiz, xotin-qizlarning magistraturada o‘qish xarajatlarini qoplash uchun davlat tomonidan 23 ming nafar qizga 200 milliard so‘m ajratilishi belgilangan.