Prezident Shavkat Mirziyoyev “Zakovat” intellektual o‘yinini aholi o‘rtasida ommaviy-ma’rifiy harakatga aylantirish va boshqa intellektual o‘yinlarni rivojlantirishga oid chora-tadbirlar to‘g‘risida” qaror imzoladi.
Qarorga asosan, 2022/23 o‘quv yilidan boshlab intellektual o‘yinlarning respublika bosqichida g‘olib bo‘lgan o‘quvchi yoshlar va talabalar uchun yil davomida har oyda beriladigan “Zakovat” stipendiyasi joriy etiladi.
2022 yildan boshlab, bosqichma-bosqich maktablar, Prezident ta’lim muassasalari, kollej, litsey, texnikum va oliygohlarda “Zakovat” intellektual klublari faoliyati yo‘lga qo‘yiladi. Hududlardagi Yoshlar markazlarida intellektual o‘yinlar jamoalari uchun alohida xonalar tashkil etiladi.
Shu yildan e’tiboran har yili talabalar o‘rtasida Intellektual olimpiada tashkil qilinadi. Unda umumjamoa hisobida dastlabki 3ta o‘rinni qo‘lga kiritgan OTMga prezident sovg‘asi topshiriladi.
Intellektual o‘yinlarning respublika bosqichida g‘olib va sovrindor bo‘lgan umumiy o‘rta, o‘rta maxsus va professional ta’lim muassasalari o‘quvchilari, OTM talabalari ta’limning keyingi bosqichiga bazaviy to‘lov-kontrakt asosida imtihonsiz qabul qilinadi.
Ta’lim muassasalaridagi “Zakovat” klublarining koordinatori bo‘lgan professor-o‘qituvchilarga mehnatga haq to‘lash fondining 50 foizi miqdorida bir martalik ustama to‘lanadi.
2022/23 o‘quv yilidan boshlab har yili aprel oyida Intellektual haftalik o‘tkaziladi.
Yoshlarga motivatsiya berish maqsadida mashhur olimlar, jumladan, Nobel mukofoti sohiblari bilan uchrashuvlar tashkil etib boriladi.
“Zakovat” va boshqa intellektual o‘yinlarining hududiy va respublika bosqichi g‘oliblarini o‘z mutaxassisligi bo‘yicha kadrlar zaxirasiga olish va rahbarlik lavozimlariga tayinlash amaliyoti yo‘lga qo‘yiladi.
