«Tolibon» harakati O‘zbekiston xalqi va rahbariyatini Mustaqillik bayrami bilan tabrikladi

“Tolibon” harakati O‘zbekiston xalqi va rahbariyatini Mustaqillik bayrami bilan qutladi. Bu haqda O‘zbekiston Tashqi ishlar vazirligi xabarida aytilgan.

Foto: Facebook

Qayd etilishicha, Afg‘oniston Islom Amirligi muzokaralar guruhi a'zosi va “Tolibon” harakati siyosiy idorasi matbuot kotibi Muhammad Suhayl Shahin O‘zbekiston Tashqi ishlar vazirligiga O‘zbekiston mustaqilligining 30 yilligi munosabati bilan o‘z rahbariyati nomidan tabrik maktubi yo‘llagan.

“Birodar O‘zbekiston Respublikasi rahbariyati va xalqini Mustaqillik bayrami bilan samimiy tabriklaymiz. Biz qo‘shni O‘zbekiston bilan samarali va do‘stona munosabatlar o‘rnatishni xohlaymiz. O‘zbekiston ishtirokida Afg‘onistonda infratuzilma loyihalarini amalga oshirish, xususan, temir yo‘l va elektr uzatish tarmoqlarini qurishni davom ettirishdan manfaatdorligimizni tasdiqlaymiz”, deyiladi maktubda.

Bildirilishicha, Afg‘oniston Islom Amirligi tomonidan o‘zbek sheriklarga bu yo‘nalishda barcha zarur yordam ko‘rsatiladi.