Xorazm viloyati, Qo‘shko‘pir tumani, O‘rtayop qishlog‘idagi «Adolat» mahallasi aholisi «Obod mahalla» dasturi asosida ta'mirlanishi kerak bo‘lgan yo‘llarda ishlar oxiriga yetkazilmay qolganidan shikoyat qilishmoqda. Odamlar yo‘llarning ta'mirlab berilishini so‘ramoqdalar.
2018 yil iyun oyida O‘zbekiston Respublikasi prezidentining «Obod mahalla» dasturi to‘g‘risida»gi farmoni imzolandi. Unda mahallalar hududini obodonlashtirish, mavjud infratuzilmani kompleks rivojlantirish, shuningdek, yo‘l-transport infratuzilmasi, muhandislik kommunikatsiyalari va ijtimoiy soha obektlarini barpo etish hamda shu asosda aholining turmush sharoitini yuksaltirish asosiy vazifalar ekani belgilab qo‘yilgan.
Farmon doirasida Xorazm viloyati, Qo‘shko‘pir tumani, O‘rtayop qishlog‘idagi «Adolat» mahallasi ham «Obod mahalla» dasturiga kiritildi.
O‘rtayop – Xorazm viloyatining chekka va katta qishloqlaridan biri. Uning «Adolat» mahallasida 2900ga yaqin aholi istiqomat qiladi.
2019 yil davomida «Adolat» mahallasida bu dasturni amalga oshirish uchun keng ko‘lamli ishlar bajarildi. Xususan, 23-son umumta'lim o‘rta maktabining 120 o‘ringa mo‘ljallangan qo‘shimcha binosi qurildi. Natijada, maktabning sig‘imi 534 o‘ringa yetdi. Bundan tashqari, maktab yuqori tezlikdagi internet tarmog‘iga ulandi.
19-son maktabgacha ta'lim tashkiloti (bolalar bog‘chasi) to‘liq ta'mirlanib, zamonaviy ko‘rinishga keltirildi. Ammo jihozlar yo‘qligi bois, hali ishga tushirilgani yo‘q. Jihozlar bilan qachon ta'minlanishi esa noma'lum.
Elektr simyog‘ochlari, simlari almashtirildi, yangi transformator o‘rnatildi. Aholi so‘zlariga ko‘ra, elektr energiyasi ta'minoti ham ancha yaxshilandi. Uy-joylarining fasad qismi ta'mirlandi. Kam ta'minlangan oilalarning uylari esa homiylik asosida ta'mirlanib, tomi yopib berildi.
