Xotin-qizlarga nisbatan zo‘ravonlik sodir etgan shaxslar maxsus psixokorreksiya dasturidan o‘tkaziladi

Vazirlar Mahkamasining “Tazyiq o‘tkazgan va zo‘ravonlik sodir etgan yoki sodir etishga moyil bo‘lgan shaxslarning zo‘ravonlik xulq-atvorini o‘zgartirish bo‘yicha tuzatish dasturidan o‘tishi tartibi to‘g‘risidagi nizomga o‘zgartirish va qo‘shimchalar kiritish haqida”gi qarori loyihasi e’lon qilindi.

Qaror loyihasi bilan quyidagilar nazarda tutilmoqda:

• xotin-qizlarga tazyiq o‘tkazayotgan yoki ularga nisbatan zo‘ravonlik sodir etgan shaxslarni tuzatish dasturidan o‘tkazish mexanizmlari mustahkamlanmoqda;
• mazkur yo‘nalishdagi ishlar qamrovini kengaytirish maqsadida tuzatish dasturidan o‘tkazuvchi mas’ul tashkilot va idoralar qatoriga Din ishlari bo‘yicha qo‘mita va uning hududiy bo‘linmalari hamda “Inson” ijtimoiy xizmatlar markazlari kiritilmoqda, shuningdek, ushbu idoralarning shaxslarni tuzatish dasturidan o‘tkazishdagi vakolatlari belgilanmoqda;
• xotin-qizlarga nisbatan tazyiq va zo‘ravonlik sodir etilishiga olib keladigan sabablarning oldini olish maqsadida zo‘ravonlik sodir etgan shaxslarni maxsus psixokorreksiya dasturlaridan o‘tkazilishi belgilanmoqda;
• zo‘ravonlik sodir etgan shaxslarning tuzatish dasturidan o‘tkazilishi jarayonini monitoring qilish va boshqarish bo‘yicha tuman (shahar) oila va xotin-qizlar bo‘limi boshliqlarining vakolatlari belgilanmoqda;
• “Xotin-qizlar va bolalar huquqlari, erkinliklari hamda qonuniy manfaatlarini ishonchli himoya qilish tizimi yanada takomillashtirilishi munosabati bilan ayrim qonun hujjatlariga o‘zgartish va qo‘shimchalar kiritish to‘g‘risida”gi qonuni bilan himoya orderining amal qilish muddati tuman (shahar) jinoyat ishlari bo‘yicha sudiga o‘tkazilgani munosabati bilan tegishli o‘zgartirishlar kiritilmoqda.

Bildirilishicha, taklif etilayotgan qaror loyihasining qabul qilinishi tazyiq o‘tkazgan va (yoki) zo‘ravonlik sodir etgan shaxslar tomonidan himoya orderi talablarining bajarilishiga, xotin-qizlarning huquqlari, erkinliklari hamda qonuniy manfaatlarini tazyiq va zo‘ravonlikdan himoya qilinishini ta’minlashga, shaxslarni tuzatish dasturidan o‘tkazish tadbirlarining natijadorligi oshishiga xizmat qiladi.