11:41 / 25.05.2021
4923
Шерзод Қудбиев солиқ тушумлари ошгани солиқ юки ошгани билан боғлиқлигини рад этди

Ўзбекистонда солиқ тушумлари 30 фоизга ошгани солиқ юки ошганидан дарак бермайди. Давлат солиқ қўмитаси раиси Шерзод Қудбиев солиқ тушумларининг ўсиши иқтисодий ўсиш суръатларига қараганда юқорироқ бўлаётгани қўмита солиқ маъмурчилигини яхши амалга ошираётгани ва аввал яширин иқтисодиётда бўлган айланманинг легаллаштирилиши билан боғлиқлигини маълум қилди.

Тошкент шаҳрида бўлиб ўтаётган «Тошкент 5 ташаббус ҳаракати» тадбирлари доирасида Давлат солиқ қўмитаси раиси Шерзод Қудбиев ёшлар билан учрашди. Тадбирда Қудбиев Kun.uz мухбирининг солиқ юки тўғрисидаги саволига жавоб берди. 

Kun.uz: — Ўзбекистонда солиқ тушумлари 30 фоизга кўпайди, ЯИМ ўсиши эса 3 фоиз. Қатор соҳалар ҳали тиклангани йўқ. Бу ҳолат иқтисодиётга солиқ юкининг ошиб бораётганидан далолат эмасми?

Солиқ қўмитаси раиси солиқ тушумларининг ошгани солиқ юки ошишидан далолат бермаслигини айтиб ўтди. Шунингдек, у ўтган йилга нисбатан 2021 йилда ҚҚС тушуми 40 фоизга ошганини ва қўмита солиқ маъмурчилигини яхши амалга ошираётганидан фахрланишини таъкидлади.

«Солиқ тушумлари деярли 30 фоизга номинал қийматда ошди, иқтисодий ўсиш номиналда ҳисобланмайди. Иқтисодий ўсишни ҳисоблаётганда албатта, инфляция даражаси ҳисобга олинади. Тўғридан тўғри баҳолаш нотўғри. Лекин солиқ тушумларининг ўсиши иқтисодий ўсиш суратларига қараганда юқорироқ бўляпти, биз бундан фахрланамиз, яъни биз солиқ маъмурчилигини яхши амалга оширяпмиз.  

Нафақат 30 фоиз, мен бошқа нарсани айтаман, қўшимча қиймат солиғи тушумлари ўтган йилги биринчи чорак билан бу йилги биринчи чоракни таққосласангиз, 40 фоизга ошди. Демак, биз ҚҚС маъмурчилигини яхши қиляпмиз.

Энди ҚҚС маъмурчилигини яхши қиляпсизми ёки иқтисодиётга солиқ юкини туширяпсизми деган савол бўлиши мумкин. Йўқ, иқтисодиётга солиқ юкини туширмаяпмиз, чунки Ўзбекистон иқтисодиёти деярли 50 фоиз сояда, буни ҳамма халқаро молия институтлари ҳам тан олди. Яъни ҳақиқий қилган айланмасини кўрсатмаяпти.

Яширин иқтисодиётда қолган товар айланмасини легаллаштириш эвазига умумий тушумни оширдик», — деди Қудбиев.

Шу билан бирга, ДСҚ раиси бир йил ичида солиқ тушумлари ошганини қўшимча қилди, бу рақамлар ҳеч қаерда келтирилмаганига урғу берди.

«Яна бир янги рақам, бу ҳеч қаерда чиқмаган ҳали. Ўтган йил май ойида 7,2 триллион сўм маблағ туширардик. Курс бўйича 720 миллион доллар. Охирги ойда 10 триллиондан ортиқ маблағ туширяпмиз, демак, ҳар ойда Ўзбекистон солиқ органлари давлат бюджетига 1 миллиард доллар пул туширади. Янги Солиқ кодекси қабул қилиниб, солиқ ислоҳотлари янги босқичга чиққани мевасини беряпти», — деди у.

Top