“O‘zbekiston ham katta oila, yaxshisi ham, yomoni ham o‘zimizniki” – Shavkat Mirziyoyev

“Vaqti kelib barcha masalalar mahallada hal qilinishiga erishamiz. Mahallalar tinch bo‘lsa, men Toshkentdagi ish kabinetimda tinch o‘tira olaman. O‘zbekiston ham katta oila, yaxshisi ham, yomoni ham o‘zimizniki. Biz shu yomonlarni ham to‘g‘ri yo‘lga solish ustida ishlashimiz kerak. Bunda mahalla faollarining, oqsoqollar, imomlarimizning roli katta. Yoshlarimizga bugungi kun mohiyatini, tinchligimiz qadrini tushuntirishimiz kerak. Atrofdagi vaziyat bizni sergaklantirishi zarur. 

Men hozir hosildorlikni oshirish evaziga paxta maydonini qisqartirib, aholiga yer bo‘lib berish bo‘yicha qarorlar qabul qilyapman. Sirdaryo aholisiga 50 sotixdan ajratilyapti. U yerda sabzi ekilsa ham qancha daromad qilish mumkin?! Andijonliklar 10 sotixdan uch martalab hosil olishyapti. Bundan maqsad ishsizlikka qarshi kurashish. Chunki ishsiz odam tushkunlikka tushadi, har kimning yo‘rig‘iga yurib ketadigan bo‘ladi.

Sirdaryo ham hosildorlikni, xalq farovonligini oshiradigan payt keldi. Mening maqsadim – bu viloyatni ishsizlik tugatilgan hududga aylantirish. Men Vengriyaga tashrifimdan keyin Sirdaryoga kelganim bejizga emas. Yil yakunlanyapti, barcha muammolarni muhokama qilib olishimiz, kelgusi yil uchun hozir zamin tayinlashimiz kerak”, – deya prezident so‘zlaridan iqtibos keltirmoqda Kun.uz muxbiri.

“Arslon bobo” fermer xo‘jaligining umumiy yer maydoni 90 gektar, shundan 46 gektari paxta, 42 gektari g‘alla va 2 gektar kartoshka. 2021 yilda 33 sentnerdan jami 158 tonna paxta yetishtirgan va shartnomani 115  foizga bajargan.