Guljahon Yo‘ldosheva qamoqdan ozod etildi, biroq unga tergov yakuniga qadar OAVga intervyu berish taqiqlandi

Koronavirusga chalingan bemor o‘limi va 250 mln so‘m budjet mablag‘larini talon-toroj qilganlikda ayblanib qamoqqa olingan Toshkent viloyati bosh infeksionisti Guljahon Yo‘ldosheva qamoqdan ozod etildi. Unga nisbatan qo‘llanilgan qamoq ehtiyot chorasi sud ajrimi bilan uy qamog‘iga almashtirildi.

Avvalroq Chirchiq shahar prokurori Baxtiyor Ibrohimov Kun.uz'ga Yo‘ldoshevaga qo‘llanilgan ehtiyot chorasi O‘zbekiston bosh prokurorining tashabbusi bilan uy qamog‘i tarzidagi ehtiyot chorasiga almashtirilayotganini aytgandi.

6 oktabr kuni jinoyat ishlari bo‘yicha Chirchiq shahar sudi binosida o‘tkazilgan sud majlisi yopiq tarzda bo‘lib o‘tdi. Unga ayblanuvchining yaqinlari ham, OAV vakillari ham kiritilmadi.

Yo‘ldoshevaning yaqinlariga ko‘ra sud ajrimida unga tergov yakuniga qadar OAVga intervyu berishi mumkin emasligi ko‘rsatib o‘tilgan. Sud majlisidan so‘ng Guljahon Yo‘ldoshevadan intervyu olishning imkoni bo‘lmadi. U majlisdan chiqiboq ichki ishlar xodimlari kuzatuvida uyiga olib ketildi.

Eslatib o‘tamiz, Guljahon Yo‘ldoshevaga nisbatan jinoyat ishi shu yil 11 avgustda Chirchiq shahar prokuraturasi tomonidan qo‘zg‘atilgan. 8 sentyabrga kelib, ehtiyot chorasi sifatida ayblanuvchi qamoqqa olingan edi. Uning qamoqqa olinishi jamoatchilik o‘rtasida keng muhokamalarga sabab bo‘ldi. Bir qator davlat va nodavlat tashkilotlarning rahbarlari mazkur hodisaga munosabat bildirib, prokuraturani shifokorga nisbatan qo‘llanilgan ehtiyot chorasi o‘zgartirishga chaqirgandi.

Saida Mirziyoyeva Toshkent viloyati prokuraturasidan shifokor Guljahon Yo‘ldoshevaga oid qarorni qayta ko‘rib chiqishni so‘radi