Konimex tumanida xorijga chiqishiga taqiq qo‘yilgan qarzdor ota farzandi uchun 32,4 mln so‘m aliment to‘lab berdi. Bu haqda MIB Navoiy viloyati boshqarmasi xabar berdi.
Ma'lum qilinishicha, Fuqarolik ishlari bo‘yicha Navbahor tumanlararo sudining 2013 yil 28 yanvardagi ijro hujjatiga ko‘ra, qarzdor A.T.dan undiruvchi A.M.ga bir nafar voyaga yetmagan farzandining moddiy ta'minoti uchun ish haqi va boshqa daromadlarining 1/4 qismi miqdorida aliment undirish belgilangan.
Mazkur hujjat sobiq sud ijrochilarining Konimex tuman bo‘limi ish yurituviga kelib tushib, ijro harakatlari olib borilgan. Qarzdorning O‘zbekiston hududidan chiqish huquqlari vaqtincha cheklangan.
Qarzdor ota 2021 yilning 25 iyul kuni chetga chiqishi kerakligi, unga nisbatan o‘rnatilgan cheklovni bekor qilishni so‘rab MIB Konimex tumani bo‘limi xodimlariga ariza bilan murojaat qilgan. O‘tkazilgan profilaktik suhbat natijasida ota farzandi 18 yoshga to‘lguniga qadar 32,4 million so‘m pul mablag‘ini oldindan to‘lab bergan.
Avvalroq viloyatning Qiziltepa tumanida yashovchi xorijga chiqishiga taqiq qo‘yilgan ota 143 million so‘m aliment to‘lagandi.
