1 apreldan chiqindini yig‘ish va olib chiqib ketish uchun nol darajali QQS bekor qilinadi

Soliq va budjet siyosatining 2024 yilga mo‘ljallangan asosiy yo‘nalishlariga ko‘ra, joriy yilning 1 aprelidan boshlab chiqindilarni to‘plash va olib chiqib ketish xizmatlari uchun nol darajali stavka bo‘yicha soliq solinishi bekor qilinadi.

Sanitar tozalash ishlarini tashkil etish respublika markazi xabarida aytilishicha, mazkur tartib joriy etilishi bo‘yicha mas’ul soliq organi tomonidan berilgan tushuntirishga ko‘ra, xizmat ko‘rsatuvchi korxona tomonidan ko‘rsatiladigan sanitar tozalash xizmatlari qiymatiga nisbatan qo‘shilgan qiymat solig‘i hisoblanadi.

Masalan, amaldagi xizmat qiymati 4000 so‘mni tashkil etsa, ushbu qiymatga nisbatan 1 apreldan boshlab 12 foiz miqdorda qo‘shilgan qiymat solig‘i hisoblanganda jami xizmat qiymati 4480 so‘mni tashkil etadi.

Yuqoridagi o‘zgarish 2023 yil 28 dekabrdagi «Soliq va budjet siyosatining 2024 yilga mo‘ljallangan asosiy yo‘nalishlari qabul qilingani munosabati bilan ayrim qonun hujjatlariga o‘zgartirish va qo‘shimchalar kiritish to‘g‘risida»gi qonunga ko‘ra amalga oshiriladi.

Toshkent shahrida yangi tariflar tasdiqlanganidan keyin chiqindilarni olib chiqish tarifi oyiga 7500 so‘mni tashkil etadi. QQS bilan bu summa 8400 so‘m bo‘ladi.