Oʻzbekistonda plastik, shisha va alyuminiy ichimlik idishlarini alohida yigʻish va qayta ishlashga topshirishni ragʻbatlantiruvchi pilot loyiha ishga tushirildi. Bu haqda Chiqindilarni boshqarish va sirkulyar iqtisodiyotni rivojlantirish agentligi xabar berdi.
Loyiha agentlik hamda Norvegiyaning chiqindilarni avtomatik yigʻish va saralash texnologiyalari bilan shugʻullanuvchi TOMRA kompaniyasi hamkorligida amalga oshirilmoqda.
Aholi plastik, shisha va alyuminiy ichimlik idishlarini maxsus fandomatlarga topshirib, har bir idish uchun 150 soʻm olishi mumkin (idish pachaqlanmagan, boʻsh va maksimal uch litrli oʻlchamda boʻlishi zarur).
Fandomatning ostki qismida plastik, shisha, alyumin idishlar uchun alohida uchta konteyner joylashtirilgan. Qabul qilingan alyumin, plastik idishlar konteynerlarga presslab joylanadi, ularning har biriga 20 mingtadan ziyod idish sigʻadi. Shisha idishlar esa oʻz holicha yigʻiladi.
Mablagʻ Click elektron hamyoniga oʻtkazib beriladi.
Shuningdek, foydalanuvchilar pulni xayriyaga yoʻnaltirishi mumkin. Bunda yigʻilgan idishlarni sotishdan tushgan mablagʻlar xayriya maqsadlari va daraxt ekish tashabbuslariga sarflanadi.
Bunday fandomatlardan birinchisi ekologiya va iqlim oʻzgarishi milliy qoʻmitasining Toshkent shahridagi asosiy binosi oldiga oʻrnatilgan.
«Fandomatlar ichimlik idishlarini boshqa maishiy chiqindilarga aralashtirmasdan alohida yigʻish va ularni qayta ishlash imkoniyatini yaratadi. Saralangan materiallardan ikkilamchi xomashyo olinib, yangi mahsulotlar ishlab chiqarishda qayta foydalanish mumkin. Bu esa tabiiy resurslardan foydalanishni kamaytirish hamda chiqindilarning koʻchalar, suv havzalari va poligonlarga tushishini qisqartirishga xizmat qiladi», – deyiladi agentlik matbuot xizmati xabarida.
Hozircha bunday fandomat Toshkent shahridan tashqari Surxondaryo viloyati Jarqoʻrgʻon tumanida ham oʻrnatilgan.
