Firdavs Abduxoliqov O‘zEOAVMA raisligidan ketdi. Uning o‘rnini Sherzodxon Qudratxo‘ja egalladi

O‘zbekiston elektron ommaviy axborot vositalari milliy assotsiatsiyasining a’zolari umumiy yig‘ilishida assotsiatsiya raisi Firdavs Abduxoliqov o‘z xohishiga binoan lavozimidan ozod etildi.

Abduxoliqov 2019 yil sentyabridan buyon Kinematografiya agentligi («O‘zbekkino») bosh direktori ham hisoblanadi.

UzReport xabar berishicha, uning o‘rniga Sherzodxon Qudratxo‘ja tayinlandi. Shu munosabat bilan u Xalqaro press-klub raisligidan ketgan. 

Sherzodxon Qudratxo‘ja 2018 yil mayidan buyon Jurnalistika va ommaviy kommunikatsiyalar universiteti rektori hisoblanadi. U universitet rektori sifatida faoliyatini davom ettiradi.

Firdavs Abduxoliqov 2003 yildan, O‘zbekiston elektron ommaviy axborot vositalari milliy assotsiatsiyasi tashkil etilganidan buyon tashkilot raisi edi. Uning lavozimdan ketishi qizi Amira Rashidova rahbarligidagi «Sevimli» telekanali atrofida ro‘y bergan mojarodan keyin ro‘y berdi.

O‘tgan oyda ushbu telekanaldagi «Sabriya» serialida axloqsiz sahna efirga uzatilgach, Kinematografiya agentligi bosh direktori Firdavs Abduxoliqovning aralashuvi bilan telekanal bosh direktori va bosh muharriri vazifasidan bo‘shatildi.

Mazkur voqea fonida davlat buyurtmalarini olgan «Sevimli» telekanali Abduxoliqovning oila a’zolariga tegishli ekani ma’lum bo‘ldi. Holat yuzasidan tekshiruv o‘tkazgan Korrupsiyaga qarshi kurashish agentligi manfaatlar to‘qnashuvi borligini tasdiqladi. Ayni paytda holat yuzasidan prokuratura o‘rganish o‘tkazmoqda.

Ma’lumot uchun, Firdavs Abduxoliqov kino sohasida vakolatli davlat organini 2019 yildan buyon boshqarib kelmoqda.