Шавкат Мирзиёев ва Владимир Путин АЭСнинг биринчи энергия блоки қурилишига старт берди

Санкт-Петербург шаҳрида бўлиб ўтган маросимда Ўзбекистон президенти Шавкат Мирзиёев ва Россия президенти Владимир Путин Ўзбекистонда интеграциялашган атом электр станциясининг биринчи энергия блоки қурилиши бошланганини эълон қилди.

Тадбирда телекўприк орқали Халқаро атом энергияси агентлиги бош директори Рафаэль Гросси ҳам иштирок этди.

Давлат раҳбари мазкур стратегик аҳамиятга эга лойиҳани амалга оширишни қўллаб-қувватлагани учун Россия президенти Владимир Путин ва АЭХА бош директори Рафаэль Гроссига миннатдорлик билдирди. Шунингдек, лойиҳада иштирок этаётган Ўзбекистон ва Россия мутахассисларининг меҳнати ва юқори малакали фаолияти алоҳида эътироф этилди.

Қайд этилишича, атом электр станцияси қурилиши Ўзбекистоннинг технологик, саноат ва илмий тараққиётида янги босқични бошлаб беради. Лойиҳа мамлакатда атом энергетикаси соҳасини шакллантириш ва ривожлантириш учун мустаҳкам асос яратади.

Лойиҳа кичик модулли атом генерацияси ҳамда йирик ҳажмли энергетика соҳасидаги замонавий технологияларни ўзида мужассам этгани таъкидланди.

Президент Шавкат Мирзиёев хавфсизлик масаласи лойиҳанинг мутлақ устувор йўналиши эканини қайд этди. Унинг сўзларига кўра, станция қурилиши ва эксплуатацияга тайёрлаш ишлари халқаро стандартлар, илғор муҳандислик ечимлари ҳамда Халқаро атом энергияси агентлигининг доимий назорати асосида амалга оширилмоқда.

Томонлар мазкур йирик энергетика лойиҳаси Ўзбекистон ва Россия ўртасидаги стратегик шериклик ва иттифоқчилик муносабатларини янада мустаҳкамлашга хизмат қилишига ишонч билдирди.