Вазирлик: метан қуйиш шохобчалари 6 соат давомида очиқ бўлади

Энергетика вазирлиги хабарида қайд этилишича, 22 декабр куни соат 10:00–16:00 оралиғида Ўзбекистон бўйича барча “метан заправка”лар штат режимида ишлайди. 

Вазирлик мазкур вақт оралиғида ҳайдовчиларга метан қуйиш хизмати одатдаги тартибда кўрсатилишини билдирган.

Сўнгги ҳафталарда айрим ҳудудларда метан қуйиш компрессор шохобчалари фаолияти вақтинчалик график асосида ташкил этилаётгани ҳақида хабарлар берилган. 

Хусусан, аввалроқ Kun.uz хабарида “Ҳудудгазтаъминот” филиаллари маълумотларига таянилган ҳолда ҳудудлар кесимида иш вақтлари турлича белгилангани ва чекловлар ҳокимликлар билан келишилган қарор асосида киритилгани келтирилган. 

Бундай чоралар совуқ кунларда аҳоли ва ижтимоий инфратузилмани газ билан узлуксиз таъминлаш мақсадида вақтинча жорий этилган. Шунингдек, 11 декабр куни Энергетика вазирлиги шохобчалар иш фаолияти чекланиши ҳақида маълум қилиб, бу қарор қўшни давлат газ тизимидаги носозликлар ортидан импорт ҳажми қисқаргани билан изоҳлангани айтилган. 

“Ҳудудгазтаъминот” газ қувурларида босимни меъёрга келтириш бўйича ишлар олиб бораётгани, чекловлар вақтинча экани билдирилган.