Яман кучлари ҳусийчиларга қарши уруш бошлади, АҚШ B-1’ларни ўз базасига қайтарди – кун дайжести

Россия-Украина уруши

Украина ва Россия қиш олдидан бир-бирининг инфратузилмасига зарбаларни кучайтиришга «бел боғлаган».

Хусусан, президент Володимир Зеленский сўзларига кўра, Владимир Путин қиш олдидан Украинадаги нишонлар доирасини кенгайтирмоқчи. Бу ҳужжатни Украина махсус хизматлари қўлга киритган.

«Биз ҳужжатларни кўрдик ва биламизки, улар инфратузилма, логистика тугунлари ва айниқса шаҳар ва қишлоқларга зарба беришга йўл қўяди. Путин шу йўл билан «куч намойиш қилмоқчи», чунки Россия қўшинлари айни пайтда позицияларини йўқотиб, катта талафот кўрмоқда», деди Украина президенти шанба куни эълон қилинган Reuters'га берган интервюсида.

Украина эса Москва тактикасига «уларнинг нефт заводлари ва уруш учун пул келтирадиган объектларига зарбалар бериш» билан жавоб қайтармоқчи.

Россия Мудофаа вазирлиги Зеленскийнинг огоҳлантиришини «эшитганини» маълум қилди. Вазирлик энди ўз навбатида «ҳарбий ва ҳарбий-саноат объектлари, шунингдек, улар билан боғлиқ инфратузилмага» ҳужумларни кучайтиришини айтди. У эскалация учун жавобгарликни шахсан Зеленскийга юклади.

Уруш халқаро майдондаги баёнотлардан ташқари фронтда ҳам давом этмоқда. Хусусан, якшанба куни Россия Киевдаги Шимолий кўприкка зарба берди. Ҳарбийлар бу орқали Украина қўшинлари ҳамда ҳарбий юкларни ташишда фойдаланиладиган йўналишни нишонга олганини билдирди.

Шунингдек, Россия кучлари Қора денгизда ҳарбий техника олиб кетаётган иккита юк ташувчи кемага ҳам зарба берганини билдирди.

Украина эса Россия бўйлаб дронлар учирди. Росcия ҳаво ҳужумидан мудофаа кучлари шанбадан якшанба тонгига қадар қатор ҳудудларда Украинанинг 559 та дронини тутиб олган ва йўқ қилган.

Бундан ташқари якшанбага ўтар кечаси Украина дронлари Адигея Республикасига ҳужум қилган. Украина Хавфсизлик хизматига кўра, Майкоп яқинидаги «Ханская» ҳарбий аэродромига берилган зарбада Россиянинг энг замонавий жанговар самолётлари – Су-35 ва Су-34 нишонга олинган. Шунингдек, дронлар аэродром ҳудудидаги ўқ-дори омборига ҳам зарба берган. Нишонгача бўлган масофа тахминан 500 километрни ташкил этади.

Францияда намойишлар давом этмоқда

Душанбадан бошлаб бутун Франция бўйлаб 400 дан 500 тагача мактаб қисман ёки тўлиқ ёпилади. Франция таълим вазирига кўра, бу қарор сўнгги кунларда полиция ва намойишчи ўқувчилар ўртасидаги тўқнашувлардан сўнг қабул қилинган. Шунингдек, вазир Эдуар Жефре намойишлар бошланганидан бери 24 та мактаб ёқиб юборилгани ёки талон-торож қилинганини айтди.

Францияда таълим стандартлари юзасидан минглаб ўқувчилар намойиш ўтказмоқда. Ўтган ҳафтада бошланган бу норозилик намойишлари Париждан бошқа шаҳарлар – Монпеле, Нант ва Марселга ҳам тарқалди. Юқори синф ўқувчилари ва бошқалар ўқитувчилар етишмаслиги, синфхоналарнинг ўта гавжумлиги ҳамда биноларнинг таъмирталаб ҳолатига эътироз билдирмоқда.

Таълим вазири душанба куни зарар кўриши мумкин бўлган мактаблар сони ошиши эҳтимолини айтди. Шу билан бирга «қисман ва босқичма-босқич дарсларга қайтишга» ваъда берди.

Расмийларга кўра, юқори синф ўқувчилари ҳаракатига суқилиб кириб, ҳаракатни ўқувчилардан тортиб олган ва зўравонликка қўл ураётган фаоллар — хусусан, ўта сўлчи гуруҳлар вакиллари бор.

Жума куни Франция адлия вазирлиги 3700 та мактабнинг 735 таси зўравонлик билан кечган намойишлардан зарар кўрганини айтганди. Ўша куни 1747 киши ҳибсга олинган.

Франция ҳукумати юқори синф ўқувчилари ва таълим ходимлари дуч келаётган қийинчиликларни ҳал қилиш учун қўшимча чоралар кўрмоқда. Бу чоралар ўқув машғулотларининг давом этишини таъминлаш, шароитларни яхшилаш, ўқув кунларини яхшироқ ташкил этишни ўз ичига олади.

Намойиш ташкилотчилари эса ҳукуматни аниқ чоралар кўрмаётганликда айблаб, намойишларни давом эттиришга чақирди.

Бразилияда сайлов

Бразилияда 4 октябр куни бўлиб ўтган президентлик сайловининг биринчи тури кутилмаган натижа билан якунланди. Собиқ президентнинг тўнғич ўғли, ўнг қанот сенатори Флавио Болсонару – амалдаги президент, чап қанот вакили Лула да Силвадан олдинга чиқди. Бироқ номзодларнинг ҳеч бири 50 фоиздан ортиқ овоз тўплай олмади, шу сабабли сайлов иккинчи турга ўтди.

Маълумотларга кўра, барча овозларнинг 99 фоизи саналганда Болсонару 47,03 фоиз, Лула эса 45,16 фоиз овоз олган. Флавио 15 штатда, Лула 12 штатда ғолиб чиққан.

Икки номзод натижага турлича муносабат билдирди. Болсонару «Бразилия ўзгариш истайди» деди ва буни Лула бошчилигидаги партия даврининг охири деб атади.

Лула эса натижани кутилмаган деб тан олди, аммо кураш ҳали тугамаганини айтди: «Эртадан янги кампания бошлаймиз».

Иккинчи турдаги кураш – биринчи турда чиқиб кетган номзодларнинг сайловчилари атрофида кечади. Учинчи, тўртинчи ва бешинчи ўринни эгаллаган номзодларнинг барчаси ўнг қанот вакиллари. Бироқ улар олдинроқ ҳеч кимни қўллаб-қувватламаслигини айтганди.

Сайлов фонида АҚШ омили ҳам муҳокама қилинмоқда. Лула Вашингтон маъмуриятини божлар, санкциялар ва визаларни бекор қилиш орқали сайловни Болсонару фойдасига оғдиришга уринишда айблаган. Трамп маъмурияти бу борада изоҳ бермаган.