Ғарбий соҳилдаги зўравонликлар
Исроил босиб олган Ғарбий соҳилда яҳудий кўчманчиларнинг фаластинликларга ҳужумлари давом этяпти. Reuters’нинг гувоҳларга таяниб хабар беришича, Рамаллаҳ шимолида қишлоқда 100 дан ортиқ кўчманчилар фаластинлик оиланинг ўз уйига қайтишига тўсқинлик қилган ва Исроил ҳарбийлари билан тўқнашган.
Тубаси оиласига тегишли икки уйни кўчманчилар бир неча ҳафта олдин эгаллаб олганди. Шундан бери оила қишлоқнинг бошқа жойида яшаб келмоқда. Душанба куни кечқурун Исроил армияси оилани уйига кузатиб бориб, кўчманчилардан ҳимоя қилишга рози бўлган. Бироқ гувоҳларнинг айтишича, оила уйга етиб борганидан тахминан 10 дақиқа ўтиб, кўчманчилар тўдаси бостириб келган. Исроил армияси баёнотига кўра, улар уйларга ўт қўйган, йўлларни тўсиб қўйган ва ҳарбийларга тош отган. Натижада уч офицер жароҳатланган.
«Зўравонлик сабабли оилани уйига қайтариш вазифаси бажарилмади», дейилади армия баёнотида. Ҳарбийлар икки кўчманчи ҳибсга олингани ва тергов бошланганини маълум қилди.
Фаластинлик уй эгаларидан бири Reutersʼга унинг уйи таниб бўлмас даражада вайрон қилинганини айтди: эшик, дераза, пол ва зиналар бузиб ташланган. Уйнинг деворлари кўчманчилар ёққан шиналар қурумидан қорайиб кетган.
Сешанба куни Ғарбий соҳилдаги Ал-Муғаййир қишлоғида ҳам кўчманчилар бир нечта машинага ўт қўйган.
Исроил бош вазири Бинямин Нетаняҳу зўравонликни қоралаб, айбдорларни жавобгарликка тортишга чақирди. Аммо исроиллик ва фаластинлик ҳуқуқ ҳимоячиларининг таъкидлашича, кўчманчилар зўравонлик учун камдан кам ҳолларда жазоланади.
IT гигантлар етакчилари Оқ уйда
АҚШда сунъий интеллект хавфсизлиги борасидаги хавотирлар кучайиб боряпти. Шундай шароитда АҚШ президенти Доналд Трамп сешанба куни Оқ уйда технология компаниялари раҳбарлари билан учрашди. Унинг айтишича, компаниялар сунъий интеллект учун ихтиёрий стандартлар жорий этишга келишиб олган.
Трамп ўз ижтимоий тармоғида эълон қилган келишув матнига кўра, компаниялар сунъий интеллект тизимлари ишлаб чиқувчилар кўзлагандек ишлаётганини текшириш учун мустақил аудиторлар билан ҳамкорлик қилади. Шунингдек, улар ўз воситалари техник тизимларга кўзда тутилмаган тарзда бузиб кирмаслигини таъминлашга ҳаракат қилади.
«Бу қайсидир маънода деярли конституцияга ўхшайди», деди Трамп келишув ҳақида. Трамп шунингдек, АҚШдаги давлат идораларига бу технологияни «сунъий интеллект» эмас «супер интеллект» деб аташни буюрди.
