Ўзбекистонда банк карталарига оид қоидаларга қўшимчалар киритилди. Марказий банкнинг тегишли буйруғи 11 ноябр куни давлат рўйхатидан ўтказилди.

Ҳужжатга кўра, бундан буён:

  • якка тартибдаги тадбиркор ва ўзини ўзи банд қилган шахслар бизнес банк картаси очиш орқали ўз ҳисобварағидаги маблағларни бошқариши мумкин;
  • 14–18 ёшдаги вояга етмаган шахслар банк картасини мустақил очиши мумкин; 14 ёшгача бўлганлар учун эса ота-онанинг бири ёки қонуний вакили ёзма розилиги талаб этилади;
  • юридик шахслар ичимлик ва оқова сув хизматлари учун тўловларни корпоратив банк карталари орқали амалга ошириши мумкин бўлади.

Банк карталари турлари қаторига ижтимоий банк картаси ҳам қўшилди.

Шунингдек, олдиндан эмиссия қилинадиган шахсий банк карталарини чиқариш ва мобил иловалар орқали фойдаланувчини идентификация қилган ҳолда активлаштириш тартиби белгиланди.