Учта хорижий давлат инвесторлари UzAuto Motors компаниясини сотиб олишга қизиқиш билдирди. Бу ҳақда 8 октябр куни бўлиб ўтган матбуот анжуманида Давлат активларини бошқариш агентлиги директори Соҳибжон Муродов маълум қилди, дея хабар берди Kun.uz мухбири.
Давактив раҳбарининг таъкидлашича, UzAuto Motors вa UzAuto Powertrain корхоналарини хусусийлаштириш бўйича амалий ишлар икки йил олдин бошланган ва Alvarez & Marsal халқаро консалтинг компанияси танлов асосида жалб этилган. Бу ушбу компаниянинг дунё автосаноатида йирик битимларни имзолашдаги иштироки ҳамда тажрибали мутахассисларга эгалиги билан изоҳланди.
«Бугунги кунда бизга таклифлар келиб тушяпти. АҚШ, Жанубий Корея ва Хитойдан инвесторлар қизиқиш билдирган. Аммо, бу қизиқишлар муайян компанияга актив сотилиши ҳақида қарор қабул қилинганини англатмайди. Бунақа сигнал кетмаслиги керак, чунки рақобатга салбий таъсир қилиши мумкин. Очиқ, халқаро савдо ўтказамиз», деди Муродов.
Унинг қўшимча қилишича, савдоларни ташкил этишга қаратилган сценарий ишлаб чиқиляпти. Кейинги босқичда халқаро консултант танланади, активлар халқаро даражада баҳоланади ва аудит ўтказилади. Шундан сўнг халқаро ва маҳаллий ОАВ орқали инвесторлар учун таклифлар эълон қилинади.
Маълумот учун, 2025 йилнинг апрел ойидаги президент қарорида йил якунигача, UzAuto Motors (99,7 фоиз) ва UzAuto Powertrain’(100 фоиз)ни хусусийлаштириш бўйича халқаро консултантларни жалб этиш кўзда тутилганди. 2026 йилнинг биринчи чорагида эса оммавий савдолар эълон қилиниши керак бўлган. Аммо жараён номаълум сабабларга кўра кечиктирилди.
Август ойида қабул қилинган 2026 йил учун мўлжалланган хусусийлаштириш дастурида ҳам ушбу икки компаниядаги давлат улушларини сотишни тезлаштириш белгиланганди. Яқин тўрт ой ичида компанияларнинг инвестицион, ишлаб чиқариш ва молиявий ҳолати бўйича материаллар тайёрланиши керак.
«Ўзавтосаноат» ва General Motors ўртасидаги битим 2017 йилнинг октябр ойида 10 йил муддатга имзоланган. Келишув доирасида UzAuto Motors GM моделларини ишлаб чиқариш лицензияси, Chevrolet бренди ва технологияларидан фойдаланиш имкониятига эга бўлган. Мазкур келишувнинг амал қилиш муддати 2027 йилда тугайди. Шу жиҳатдан эҳтимолий харидор Америка компанияси билан бирга ишлайдиган ташкилотлардан бири бўлиши мумкинлиги тахмин қилинди.
Шундан сўнг, Давлат активларини бошқариш агентлиги UzAuto Motors’ни хусусийлаштириш очиқ ва рақобат асосида амалга оширилишига урғу бериб, General Motors компаниясига активни сотиб олиш учун имтиёз ёки устувор ҳуқуқ берилмаслигини
