Saudi Aramco биносига ҳужум
Saudi Aramco нефт компаниясининг Саудия шарқидаги Заҳрон шаҳрида жойлашган маъмурий биноси ҳужумга учради. Бу ҳақда Саудия Арабистони Энергетика вазирлиги 14 октябр куни баёнот тарқатди.
Вазирликка кўра, ҳодиса 13 октябр куни кечқурун содир бўлган, ҳужум оқибатида чекланган миқёсда ёнғин чиққан, ҳалок бўлган ёки жароҳатланганлар йўқ. Компаниядаги манбасига таяниб Reuters'нинг ёзишича, Заҳрондаги Aramco бош қароргоҳи мажмуасига баллистик ракета тушган. Бинонинг юқори уч қавати шикастланган.
Саудия Арабистони бошчилигидаги коалиция Заҳронда уриб туширилган ракета парчалари турар жой ҳудудига тушганини маълум қилди. Ар-Риёдда ҳам ҳусийларнинг иккита ракетаси уриб туширилгач, уларнинг парчалари тушиши оқибатида тўрт киши жароҳатланган.
Ҳусийлар бир ҳафтадан буён Саудия Арабистонининг муҳим объектларига баллистик ракета ва дронлар учирмоқда. Ҳусийлар коалициянинг Санога берган зарбаларига «қаттиқ ва аламли» жавоб қайтариш билан таҳдид қилганди.
Саудия кучлари эса Сано чеккасидаги ёқилғи омбори ва бошқа объектларга “ҳусийларнинг таҳдид солиш имкониятларини зарарсизлантириш” мақсадида зарба берганини билдирган.
Феврал ойида Эрон Ҳўрмуз бўғозини ёпганидан кейин Боб ал-Мандаб Саудия Арабистони янада муҳим йўлга айланган. Ямандаги можаро 28 феврал куни АҚШ ва Исроилнинг Эронга ҳужуми билан бошланган кенгроқ урушнинг давоми сифатида қайта авж олди. Саудия Арабистони халқаро миқёсда тан олинган Яман ҳукуматини қўллаб-қувватлаб, ўтган ойда ҳусийларга қарши ҳарбий кампаниясини қайта бошлаганди.
АҚШ элчиси атрофида можаро
АҚШнинг Грециядаги элчиси Кимберли Гилфойл атрофидаги можаро унинг лавозимдан кетиши билан якунланмоқда. Оқ уй 13 октябр куни Гилфойлдан истеъфога чиқишни сўраганини маълум қилди. Бунга элчи пул, совға ва турли хизматлар эвазига Трамп маъмурияти расмийлари билан учрашиш имкониятини сотгани ҳақидаги бир қатор хабарлар сабаб бўлган.
АҚШ президенти Доналд Трамп бир кун аввал Гилфойлни ишдан бўшатишни кўриб чиқаётганини айтган эди. “У яхши ишлаётган эди, лекин биз ўқиган нарсалар бизга ёқмади”, деди Трамп журналистларга. Оқ уйнинг янги матбуот котиби Кейти Закария ҳам Гилфойлдан истеъфо сўралганини тасдиқлади.
Гилфойлнинг ўзи эса айбловларни яна рад этди: “Бу айбловлар ёлғон, мен номим, обрўйим ва ҳалоллигимни қатъий ҳимоя қилмоқчиман”, деб ёзди у.
