Ўзбекистон Трампнинг Тинчлик кенгашига таъсисчи давлат сифатида қўшилади

АҚШ президенти Доналд Трамп Ўзбекистонни ҳам Ғазо сектори бўйича халқаро Тинчлик кенгашидан доимий ўрин олишга таклиф этди.

Президент матбуот хизмати хабарига кўра, Шавкат Мирзиёев номига АҚШ президенти Доналд Трампдан «Яқин Шарқда тинчликни мустаҳкамлаш ва можароларни ҳал этиш бўйича халқаро ташаббусга қўшилиш» ҳақида расмий таклиф келиб тушган.

Мактубда қайд этилишича, ушбу ташаббус 2025 йил 29 сентябрда эълон қилинган ва жаҳон етакчилари томонидан қўллаб-қувватланган, шунингдек, БМТ Хавфсизлик Кенгашининг 2025 йил 17 ноябрдаги 2803-сонли резолюцияси билан маъқулланган Ғазодаги можарони тугатиш бўйича комплекс режага асосланади.

Ташаббуснинг асосий мақсади узоқ муддатли тинчлик, барқарорлик ва хавфсизликни шакллантириш учун масъулиятни ўз зиммасига олишга тайёр бўлган давлатларни бирлаштиришга қаратилган янги халқаро тузилма – Тинчлик кенгашини тузишдан иборат.

Ўзбекистон Республикасига Тинчлик кенгашига таъсисчи давлат сифатида қўшилиш таклиф этилган.

Давлат раҳбари америкалик ҳамкасбига жавоб мактубини йўллаб, унда Ўзбекистон Тинчлик кенгашига таъсисчи давлат сифатида қўшилишга тайёрлигини билдирди.

Президент ўз мактубида ушбу ташаббусга Яқин Шарқдаги кўп йиллик низоларни ҳал этиш, кенг минтақада тинчлик ва барқарорликни таъминлаш йўлидаги муҳим қадам сифатида қаралаётганини таъкидлади.

Ғазо секторида ўт очиш тўхтатилганидан кейин ҳудудни бошқариш учун халқаро орган ташкил этиш режалаштирилганди. Оқ уй аллақачон АҚШ давлат котиби Марко Рубио, Яқин Шарқ бўйича махсус вакил Стив Уиткофф, АҚШ президентининг куёви Жаред Кушнер ҳамда Буюк Британиянинг собиқ бош вазири Тони Блэр Тинчлик кенгаши таркибидан ўрин олишини эълон қилган.

Бироқ, Bloomberg танишиб чиққан низом лойиҳасига кўра, Тинчлик кенгаши анча кенгроқ функцияларга эга бўлиши назарда тутилган. Ҳужжатда у «барқарорликка кўмаклашиш, ишончли ва қонуний бошқарувни тиклаш ҳамда можаролар таъсир кўрсатган ёки таҳдид остида бўлган ҳудудларда мустаҳкам тинчликни таъминлашга интилаётган халқаро ташкилот» деб таърифланган. Кенгашга Трампнинг ўзи раислик қилади ва қарорлар у томонидан тасдиқланиши керак бўлади.