Ўзбекистонда исломий банклар тўғрисидаги қонун қабул қилинди

11 ноябр куни Олий Мажлис Қонунчилик палатаси исломий банклар фаолиятини жорий этишга доир қонун лойиҳасини иккинчи ва учинчи ўқишларда қабул қилиб, Сенатга юборди.

Депутатлар лойиҳанинг қуйидаги нормаларини алоҳида эътироф этди:

• лицензиялаш талаби: исломий банк фаолияти учун алоҳида лицензия олиш шартлари аниқ белгилаб қўйилади;
• стандартлар ва тушунчалар: исломий молия операциялари (мурабҳаа, ижара, мушорака, мудораба ва бошқалар)га оид ҳуқуқий тушунчалар очиб берилади, исломий молия стандартлари татбиқ этилади;
• фаолият доираси: банкларга мижозларни молиялаштириш учун савдо фаолиятини амалга ошириш, юридик шахслар ташкил этиш, уларнинг устав фондларида улуш/акция сотиб олиш ҳуқуқи берилади;
• солиқ тартиби: исломий молия операцияларига мос солиқ механизми жорий этилади.

Ушбу қонун исломий банк хизматларини босқичма-босқич жорий этиш, молиявий қамровни кенгайтириш, яширин иқтисодиёт улушини қисқартириш ва хорижий инвестицияларни жалб қилишга хизмат қилади.